1,315 Бардыгы /

 «Чек арасыз кабарчылар» эл аралык уюму Казакстанда 9-майда болгон нааразылык акциялары маалындагы «жапырт интернет цензураны» айыптап, өлкө президенти Касым-Жомарт Токаевди «репрессиялык ыкмалардан баш тартууга» чакырды.

Уюмдун расмий билдирүүсүндө айтылгандай, 9-май күнү эртең менентен бери өлкөдө «Азаттыктын» казак кызматы баш болгон бир топ маалымат каражаттарынын сайттары, ошондой эле Facebook, Telegram, YouTube жана Instagram ачылбай калган. Уюм бул сайттарга бөгөт коюулганына мурдагыдай эле нааразылык акциялар себеп болгонун белгиледи.

«Адамдардын маалымат алуу укугунун массалык түрдө чектелишин эч нерсе менен актоого болбойт. Казакстандын бийлиги реформалык багыты ишенимдүү болсун десе, мурдагы доордун мындай репрессиялык ыкмаларынан баш тартышы керек. Интернеттеги цензура — Казакстандын «Дүйнөлүк сөз эркиндиги индексинде» 180 өлкөнүн ичинен 158-орунду алып жаткандыгынын бирден бир себеби. Бул көрсөткүч өлкөнүн эл аралык имиджине терс таасирин тийгизүүдө», — деп билдирди уюмдун Европа жана Борбор Азия боюнча бөлүмүнүн башчысы Жоханна Бира.

9-майда Казакстанда бир катар жергиликтүү маалымат каражаттары менен укук коргоо уюмдарынын сайттарына бөгөт коюлган. Ошондой эле интернет колдонуучулар кээ бир социалдык түйүндөргө кире албай, айрымдары жалпы эле интернет менен мобилдик байланыштын үзгүлтүккө учурап жатканына даттанышкан.

Мурдараак өлкөдө тыюу салынган «Казакстандын демократиялык тандоосу» кыймылы 9-майда «Өлбөс полк» менен катар митинг өткөргөнү жатканын кабарлаган. Буга байланыштуу полиция бул күнү өлкөнүн Нур-Султан, Алматы жана Актөбө шаарларында көчөгө чыккан бир нече кишини кармап кеткен.

www.