Аймак

ЭЛЕКТР ЗЫМДАРЫ КУРЧАГАН ЭС АЛУУ БАГЫ

ЭЛЕКТР ЗЫМДАРЫ КУРЧАГАН ЭС АЛУУ БАГЫ

 2,127 Бардыгы /

Жалал-Абад шаарынын СМУ шаарчасындагы Бекмамат Осмонов көчөсүндө жогорку чыңалуудагы электр мамычалары орнотулуп, чубагылары тартылган жерге шаардыктар эс алуучу сквер курулуп жатат. Эреже боюнча жогорку чыңалуудагы чубалгы өткөн жерде башка да курулуштарды курууга болбойт, анткени коопсуздук талаптары бузулат. Ошого байланыштуу “Жалалабатэлектро” ачык акционердик коому туура эмес курулушка чара көрүү үчүн Мамэкотехинспекция кызматына кабарлаган.

Мамлекеттик экологиялык-техникалык коопсуздук кызматы шаардык курулуш департаментине курулушту жүргүзбөө тууралуу кат жүзүндө билдирүү жөнөткөн. Азырынча бул кайрылууга шаардык бийликтерден жооп келе элек. Эгер майнап чыкпаса, Мамэктехинспекциябул ишти укук коргоо органдарына өткөрүп берет. Бул тууралуу Мамэкотехинспекциянын Жалал-Абад шаары, Сузак району боюнча башкармалыгынын инспектору Замирбек Давлеталиев билдирди.

Анын айтымында, областтык оорукананы жана шаардагы мекеме-ишканаларды тейлеген, ошондой эле Сузак районуна өткөн эки чоң линия жайгашкан.  35 киловатт/саат чыңалуудагы электр түркүгү жайгашкан жай короого алынгандыктан, бир топ жылдардан бери бош жаткан.

Ал эми шаардык курулуш департаментинин башчысы Акылбек Нуркулов экотехинспекциянын койгон талаптарына ылайык, мурдагы долбоорго өзгөртүү киргизишкенин билдирди.

-Жаңы сквердин курулушуна шаар казынасынан 5 миллион сом бөлүнүп, тендердик наркы 3 миллион 100 сомго бааланды. Куруучулар ишти 10-июлга карата бүткөрүп, пайдаланууга беришмекчи. Экотехинспекциянын 3 пунктан турган талап жөнөткөн. Аларга ылайык фонтан курулбай турган болду. Электр чубалгыларына жеткирбей кыркып туруу үчүн кайың дарагын эгип жатабыз. Электр түркүгүнө чейин чоң унаа кире алат.

Ал эми Экотехинспекция тарабынан жөнөтүлгөн катка жооп берүүнү Жалал-Абад шаардык Курулуш департаменти Архитектура башкармалыгына тапшырган. Бирок, катка жооп берүүнүн мыйзамдуу мөөнөтү бүтүп бараткандыгына карабай, экотехинспекцияга жооп бара элек.

Кызык жагдай, скверге 108 түп кайың көчөтү отургузулду. Тийиштүү адистер кайың бийик өсүп электр чубалгыларына тоскоолдук жаратат дешет. Бирок, куруучулар кайың жапыз өсөрүн, эгер өсүп кетсе, бутап  турушарын айтышат. Курулуш иштери токтогон жок жана өз убагында пайдаланууга берүү пландалган.  Энергетиктер менен экотехинспекциянын каршылыгы орундуубу? Жогорку чыңалуудагы электр түркүгү бар, короого алынган аймак экенине шаар мэриясы көңүл бурабу жокпу аны убакыт көрсөтөт.

 

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17