3,243 Бардыгы /

Жалал-Абад. 27-май күнү Сузак районунун Кара-Дарыя айылында экинчи ирет элдик китепкана ачылды.

Китепкана “Бир адамдан бир китеп” долбоорунун алкагында активдүү жаштардын демилгеси менен ачылган. Иш-чаранын ачылуу аземине Сузак райондук мамлекеттик администрациясынын социалдык бөлүмүнүн башчысы жана райондук билим берүү бөлүмүнүн жетекчиси, райондук жаштар комитетинин төрагасы, Кара-Дарыя айыл өкмөт башчысынын орун басары, жергиликтүү депутаттар, айыл тургундары жана активдүү жаштар катышты.

Аталган саамалык Кара-Дарыя жаштар коомунун демилгеси менен ишке ашып, алар долбоорго жарандар активдүү катышканын белгилешти. Кошумчалай кетчү жагдай буга чейин да айылда аталган долбоордун алкагында 400гө чукул китеп чогулуп, 6-апрелде ачылуу аземи өткөн.

“Эки жума ичинде уюштурулган бул долбоорго өлкөбүздүн ар тармактагы белгилүү инсандары Аскар Салымбеков, Нуржигит Кадырбеков, Эрмек Нурбаев сыяктуу агаларыбыз да катышып, айыл эли үчүн жаңы китептердин топтомдорун алып беришти. Мындан сырткары дагы көптөгөн инсандар колдоо көрсөтүштү. Белгилей кетсек, китепканада ар кайсы тармактагы жаңы китептер топтолду. Жалпы 856 китеп чогулуп, ал айылдагы эски китепкананын имаратынын ичине жайгаштырылды. Эми китеп окуйм деген жердештерибиз китепканадан өлкөбүздө акыркы чыккан китептерди да табып окуй  алышат. Долбоорго катышып, колдоо көрсөткөн ар бир демөөрчүгө терең ыраазычылык билдиребиз” – дейт Ысхак Мадимаров Кара-Дарыя жаштар коомунун төрагасы.

Белгилей кетсек, “Бир адамдан бир китеп” долбоорунун максаты китеп окууну даңазалоо, руханий, интеллектуалдык потенциалды жогорулатуу ошондой эле шаар, регион, алыскы айылдарда китеп жетишсиздиги жана китепкана көйгөйлөрүн чечүүгө багытталган. Учурда бул долбоор өлкөнүн булуң-бурчтарында кеңири ишке ашууда.

Бүбүсара ОРОЗАЛИЕВА, “Аймак”