1,462 Бардыгы /

Oрусия өкмөтү Байкоңур космодромунан “Союз-2” ракеталарынын калдыктары түшө турган жер боюнча Казакстан менен түзүлгөн келишимдин долбоорун жактырды.

Жаңы трасса космодромдун түндүк бөлүгүндө жайгашкан, ага ылайык, ракета калдыктары Казакстандын Костанай облусуна түшөт. Кеп болуп жаткан аймак Орусия менен Казакстандын ортосундагы негизги ижара келишиминде көрсөтүлгөн эмес. Бул тууралуу “Настоящее Время” телеканалы билдирүүдө.

Макулдашуунун тексти укуктук маалыматтар сайтында жарыяланды, келишим беш жылга түзүлгөн.

Документке ылайык, “Союз-2” ракеталары Байкоңурдан 1-апрелден 30-июнга чейинки башка убакыттарда, жыл бою учурулат. Космодромду ижарага алган “Байтерек” ишканасы ракета учурула турган маал тууралуу элди алдын ала кабардар кылып, керек учурда тургундарды көчүрүүгө, ракета калдыктары түшкөн жерди убагында тазалоого милдеттүү. Мындан тышкары Орусия ракета учурулгандан кийин пайда болгон өрттү өчүрүүгө, ракета майлары менен ууланган жерлерди тазалоого тийиш.

Ракета калдыктары түшө турган жаңы аймак үчүн Орусия Казакстанга жылына кошумча 460 миң доллар төлөйт.

Орусия ракета калдыктары түшө турган жерлерди ижарага алуу боюнча сүйлөшүүлөрдү жүргүзүп жатканы 2018-жылдын башында белгилүү болгон. Казакстандын коргонуу жана аэрокосмостук өндүрүш министри Бейбут Атамкулов ракетанын калдыктары түшкөн аймакта экологиялык абал өзгөрбөйт деп ишендирген.

Бирок экологдор ракета калдыктары Костанай облусундагы Жангелди районуна түшөрүн, ал жерге жакын аймакта “Алтын дала” жаратылыш коругу жайгашканын билдиришүүдө.

Атамкулов ракеталарды учуруу сайгактар үчүн коркунуч жаратпай турганын айткан:

– Эгерде чечим кабыла алынса, үч жылда жети гана жолу ракета учурулушу мүмкүн. Анда жаңы, экологиялык жактан таза, кычкылтектүү керосин менен иштеген кыймылдаткыч колдонулат. Экологиялык коркунуч болот деген, чынын айтсам, бул – жөн эле фобия. Мына, 60 жылда 2,5 миңдей ракета учурулду.

Орусия Байкоңур космодромун 1994-жылдан бери пайдаланат. Казак космодромунун бир жылдык ижара акысы 115 миллион доллар. 14 жылда Орусия Казакстанга 2,6 миллиард доллар төлөп берген.

www.