3,516 Бардыгы /

ЖАЛАЛ-АБАД.   Кечээ, 8-июнда «Балдарга жана жаштарга жагымдуу Кыргызстан» долбоорунун жыйынтыктоочу иш-чарасы өттү.

Иш-чара Сузак районунун Курманбек айыл аймагына караштуу Саты айылында өтүп, ага жалпысынан долбоорго катышкан жүздөй окуучу чогулду. Иш-чаранын расмий бөлүгүндө эки жыл бою аткарылган иштердин көргөзмөсү коюлду жана долбоор менен мыкты иштешкендерге сертификаттар ыйгарылды. Андан соң иш-чара ошол эле айылдагы лагерде улантылып, спорттук оюндар менен коштолду.

Эки жылдык түзүлгөн долбоор республика боюнча Сузак районунда жана Чүй областынын Ысык-Ата районунда ишмердүүлүгүн жүргүзгөн. Ал эми Сузак районунан Мичурин, Саты, Бакиров, Чанаков жана М.Төрөмаматов атындагы орто мектептери долбоор менен мыкты иштешкен.

Аталган долбоордун катышуучулары мыкты досторду тапкандыгын жана көп тажрыйбага ээ болушканын баса белгилешти.

“Биз 2 жылдан бери ушул долбоордун катышуучусу болуп келе жатабыз. Ушул жылдардын аралыгында бизге көп нерселерди үйрөтүштү. Бир топ жерлерди көрүп, тажрыйба алмаштык. 2 жыл мурун мен эл алдына чыгып сүйлөөдөн тартынчумун. Өзүмдөгү таланттарды алып чыгуудан коркчумун. Долбоордун жардамында бир топ ийгиликтерге жетиштим, көптөгөн досторду таптым. Мындан сырткары районубуз үчүн да аздыр-көптүр салып коштук деп айта алам. Дагы айтып кетчү нерсе биз мында  дебат оюнун үйрөндүк. Ал аркылуу мектепте кандайдыр бир көйгөй жаралса, аны дебат аркылуу чечүүгө жетиштик” – дейт, Анара Эргешалиева долбоордун катышуучусу.

Белгилей кетсек, «Балдарга жана жаштарга жагымдуу Кыргызстан» долбоору жаштардын жана өспүрүмдөрдүн, коомчулуктун өнүгүүсүнө бирдей катышуусу үчүн потенциалын жогорулатууга жана диалогдорду түзүүгө багытталган. Долбоор Борбордук Азиядагы Билим Берүүчү Дебат Ассоциациясы (IDEA СА) жана БУУнун балдар фонду (ЮНИСЕФ) менен биргеликте Улуу Британия өкмөтүнүн колдоосу менен уюштурулуп келген. Алдыда дагы бул долбоорду улантуу иштери боюнча сүйлөшүүлөр жүрүүдө.

Бүбүсара ОРОЗАЛИЕВА, “Аймак”