1,851 Бардыгы /

Кыргызстандын түштүк башкалаасында жайгашкан жогорку окуу жайларында талапкерлерди кабыл алуу өнөктүгү дээрлик жанданды. Ош гуманитардык педагогикалык институтунун (ОГПИнин) кабыл алуу комиссиясынын жооптуу катчысы Данияр АПЫЕВ жалпы республикалык тестирлөө (ЖРТ) агартуу тармагындагы жекмкорлукка чекит койду деп эсептейт.

– Данияр мырза, ОГПИ – өлкөбүздөгү мыкты мугалимдерди белендеген окуу жайы экендиги талашсыз. Кайсыл адистиктерге талапкерлер көбүрөөк тапшырып жатышат?

– Башталгыч класстарды окутуу, мектепке чейинки билим берүү адистиктерине тапшыргандар улам арбып баратат. Анткени, бул кесипке ээ болгондорго республикабыздын булуң-бурчунан жумуш табуу абдан эле жеңил.

Мындан тышкары англис тили адистигин тандагандар дагы абдан арбыды. Себеби, азыркы замандын зарылчылыгына жараша бул кесипти аркалагандарды турмуш өзү көбүрөөк талап этүүдө. Анын үстүнө чет тилинде беймарал жазып-сүйлөгөндөр башка мамлекеттерде жеңил-желпи гана ишке орношушат экен.

 – Быйыл ОГПИде жапжаңы адистиктерди дагы ачыпсыздар го. Мунун зарылчылыгы бар беле?

– Ооба. Жогорку билим беүүчү Аймак таануу (Жапон) адистигинин тушоосун кестик. Билесиздер, мурун ОГПИнин алдында Жапония жумушка жайгаштыруу борбору туруктуу иштечү. Эми минтип ошонун эле алкагында жапан адистигине кабыл алууну баштадык. Мындан ары бул кесипке ээ болгондорго, ошентип, жумуш табуу дагы ого бетер жеңилдеди. Анткени, аталган борбор эми Жапан адистигин бүтүргөндөрдү жумуш менен дагы толук кандуу камсыз этмекчи.

 Буга улай котормо иши, экология жана айлана-чөйрөнү коргоо, колдонмо информатика, эсептөө техника каражаттары жана компьютер тармактарын техникалык тейлөө адистиктери дагы жаңы эле ачылды. Бирок, буларга тапшыргандар дагы абдан арбын.

 – Данияр мырза, бирок, башка ЖОЖдордогудай эле ОГПИде деле окууга ташырууда тааныш-билишчилик жана жемкорлук дегеле жоюлган жок да, туурабы?

– Мен мындай жүйөөсүз шексингендерге жана ашкере санаркоолорго таптакыр кошулбаймын! Жалпы республикалык тестирлөө (ЖРТ) ЖОЖдордогу жемкорлукка биротоло чекит койду. Эми таанышың танка болсо дагы, ЖРТнын жыйынтыгын эч ким бурмалай албайт. Төмөнкү балл менен ОГПИге эле эмес башка ЖОЖдорго дагы таптакыр өтө албайсың…

                       Алишер ТОКСОНБАЕВ, өз кабарчы