1,051 Бардыгы /

Казакстанда мамлекет тарабынан насыялары төлөнө турган, жашоо шарты оор жарандардын тизмеси толукталат. Бул тууралуу 9-сентябрда эмгек жана социалдык коргоо боюнча вице-премьер-министр Светлана Жакупова билдирди.

Буга чейин айрым казакстандыктар мамлекеттик органдарда жеке маалыматтары болбогондуктан насыяны төлөө боюнча тизмеге кирбей калышкан.

Насыяны жабууга багар-көрөрү жоктугуна байланыштуу социалдык төлөм алган, майып балдары бар, даректүү түрдө социалдык жардам алган үй-бүлөлөр жана 29 жашка чейинки томолой жетимдер, ата-эне камкордугунан ажыраган жашы жете элек өспүрүмдөр талапкер боло алат.

Булар 3 миллион теңгеден көп эмес өлчөмдө күрөөсүз, тиричилик насыясын алган жана карызы 300 миң теңгеден ашпаган кишилер болушу керек. Светлана Жакупованын айтымында, Эмгек министрлиги бул категорияларга кириши мүмкүн болгон 2 миллион 289 миң кишинин болжолдуу тизмесин түздү:

– Булардын ичинен 507 миң кишинин насыясы жабылды.

Казакстан Улуттук банкынын төрагасынын орун басары Олег Смоляков 5-сентябрда мамлекет банктарга жана микрокредиттик уюмдарга 105 миллиард теңге төлөп бергенин маалымдаган.

Олег Смоляков насыяны төлөө акциясына катышкан жарандар “кара тизмеге” киргизилбей турганын, кийин алар банктардан кайрадан насыя алса болорун белгилеген.

2019-жылы июнда Казакстан президенти Касым-Жомарт Токаев калктын аярлуу катмарына кирген кишилердин тиричилик насыяларынын бир бөлүгүн кечүү жөнүндө жарлыкка кол койгон.

Быйыл февралда Астананын четинде үй өрттөнүп, беш бир тууган кыз мерт болгон. Ошондон бери үй-жайдан кыйналган көп балалуу жана жалгыз бой энелер бийликтен социалдык колдоону күчөтүүнү, турак жай маселесин чечип, жөлөк пулду көтөрүүнү талап кылып маал-маалы менен нааразылык акцияларына чыгып жатышат.

www.