877 Бардыгы /

БИШКЕК. Президент Сооронбай Жээнбеков бүгүн Президенттин Аппаратынын жетекчиси Досалы Эсеналиев, Коопсуздук Кеңешинин катчысы Дамир Сагынбаев, Тышкы иштер министри Чыңгыз Айдарбеков жана Кыргыз Президентинин Аппаратынын тышкы саясат бөлүмүнүн башчысы Данияр Сыдыковдун катышуусунда Кыргыз-Тажик мамлекеттик чек арасында түзүлгөн кырдаал боюнча жумушчу кеңешме өткөрдү.

Мамлекет башчысы адегенде Баткен облусундагы чек ара тилкесинде  чыр-чатак пайда болгондон баштап, толук ыкчам маалымат алып тургандыгын  баса белгиледи. Андан кийин кеңешменин катышуучулары Тажикстандын тиешелүү мамлекеттик органдарынын өкүлдөрү менен жүргүзүлгөн сүйлөшүүлөр жөнүндө өзүнчө маалымат беришти. Ок атуучу куралды биринчи болуп тажик тарап колдонгондугу дагы бир ирет баса белгиленди.

Сооронбай Жээнбеков мындан ары чыр-чатакты курчутпай, жергиликтүү калкка түшүндүрүү жараянын жүргүзүү зарылдыгын катуу эскертти. Ошондой эле жаракат алган жарандар зарылдыгына жараша Бишкек шаарындагы ооруканаларга алып келине тургандыгын дагы баса белгиленди. Буга улай мамлекет башчысы Кыргыз Республикасынын Мамлекеттик чек ара кызматынын атайын даярдыктагы «Бөрү» отрядынын аскер кызматчысы Равшан Муминовдун аскердик милдетин аткарууда курман болгондугуна байланыштуу маркумдун үй-бүлөсүнө терең кайгыруу менен көңүл айтты.

Президент Сооронбай Жээнбеков кеңешме соңунда белгилегендей, кырдаалды жөнгө салуу Эл аралык укуктун алкагында жана Тажикстандын Президенти Эмомали Рахмон менен сүйлөшүүлөрдүн жүрүшүндө бир канча жолу белгиленген мурда жетишилген келишимдердин негизинде гана жүргүзүлүшү кажет!

Алишер ТОКСОНБАЕВ, өз кабарчы