883 Бардыгы /

НЬЮ-ЙОРК. Терроризм менен күрөшүү көйгөйлөрү Кыргыз Республикасынын Тышкы иштер министри
Чыңгыз Айдарбеков менен БУУнун Башкы катчысынын орун басары В.Воронков жана БУУнун Контртеррористтик комитетинин директоратынын аткаруучу директору М.Конинкс менен жолугушууларында дагы абдан кеңири талкууланды.

Жолугушуу маалында коопсуздук, терроризмге жана экстремизмге каршы күрөшүү жаатындагы аракеттер ачык эле айтылды.
Экстремизмге жана терроризмге каршы күрөштө Кыргызстандын БУУнун программаларына колдоо көрсөтүүсү ачыкталды.Ошондой эле 2017-2022-жылдарга экстремизмге жана терроризмге каршы күрөшүү боюнча Кыргызстандын Программаларын жүзөгө ашыруу максатында Эл аралык эксперттик жана каржылык-техникалык жардамды тартуу маселеси боюнча Кыргызстан менен БУУнун өз ара аракеттенүүсүн  мындан ары активдештирүү жагы баса айтылды. 
Мындан тышкары терроризмге каршы күрөштө жаралган олутуу көйгөйлөргө адекваттуу жооп кайтаруу боюнча Борбор Азия өлкөлөрүнө  жардам көрсөтүүгө багытталган БУУнун Глобалдык контртеррористтик стратегиясын ийгиликтүү ишке ашыруу боюнча Борбор Азия өлкөлөрүнүн Биргелешкен иш-аракеттер Планынын алкагында долбоордун үчүнчү этабын жүзөгө ашыруу маселелери каралды. Ушул эле күнү Кыргыз Өкмөтүнүн мүчөсү Чыңгыз Айдарбеков Бириккен Улуттар Уюмунун Контртеррористтик комитетинин Аткаруучу директоратынын Аткаруучу директору (КТК АД) Мишель Конинкс менен дагы эки тараптуу жолугушту. Анда
Кыргызстандын БУУнун КТК АД менен кызматташтыгынын актуалдуу маселелери, мунун ичинде терроризмди болтурбоо жана ага каршы күрөшүү боюнча мамлекеттердин дараметин бекемдөө боюнча чаралар жана Бириккен Улуттар Уюмунун бул жааттагы системасынын ролун күчөтүү боюнча пикирлер алмашылды.

Соңунда тараптар Кыргызстан менен КТК АДнын ортосундагы кызматташтыктын пландалган иш-чараларын, мунун ичинде 2019-жылдын декабрь айында КТК АДнын Кыргызстанда боло турган баалоочу миссиясынын иш-сапарын, ошондой эле терроризмди болтурбоо жана ага каршы күрөшүүгө байланыштуу Эл аралык конвенцияларды жана протоколдорду ишке ашырууга көмөк көрсөтүү максатында Борбор Азия мамлекеттерине техникалык жардам көрсөтүү маселелерин катуу талкуулады.

Алишер ТОКСОНБАЕВ, өз кабарчы