1,178 Бардыгы /

Мэрдин кабылдамасында чөнтөк телефону жоголсо, депутаттар жарым саатта позицияларынан тайып ишенбөөчүлүк көрсөтүштү. Саясий оюндун чоо-жайы.

Сөз башында тактай кетсек, Төлөн Бакиров үстүбүздөгү жылдын июль айынан тарта “Жалал-Абад суу канал” башкармалыгын жетектеп келген чиновник. Ага чейин “Жалал-Абад Тазалык” муниципалдык мекемесин жетекчиси болуп иштеген. Жогорку кеңештин депутаты жана төраганын орун басары Мирлан Бакировдун бир тууган иниси.

Адаттагыдай эле, ар аптанын башында шаардык мекеме-ишканалардын жетекчилери мэрияга аппараттык жыйынга чогулушкан. Жыйындан кийин коммуналдык кызматтын жетекчиликтерин мэрдин кабылдамасына чогулушка чакырышкан. Катардагы башка жетекчилердей эле Суу канал башкармалыгынын жетекчиси Төлөн Бакиров да чөнтөк телефонун кабылдамадагы катчы кызга калтырып кеткен. Арадан бир саат өтүп жыйындан чыкканда телефону ордунда жок болуп чыккан. Т.Бакиров ички иштер кызматына арыз менен кайрылган. ОИИБнын билдиришинче мекеме жетекчиси 29 миң сомдук телефону жоголгондугун айтып арыз жазган. Кылмыштардын жана жооруктардын бирдиктүү реестрине уурулук фактысы менен катталып, териштирүү иштери башталган. Кызыгы милиция текшерген учурда мэриядагы видеобайкоодогу ошол күнкү жазуу өчүрүлгөн болуп чыккан.

Андан бир жума өтпөй, тагырагы 30-сентябрда шаардык кеңештин депутаттары кезексиз сессияга чогулушкан. Ун тартибиндеги 9 маселе калып кетип эле депутаттар Жалал-Абад суу канал башкармалыгынын жетекчиси Төлөн Бакировго ишенбөөчүлүк көрсөтүүнү талкууга алышкан. Демилгени Шайырбек Ташиев көтөрүп чыккан. Ал аталган мекеме жетекчисинин ишиндеги кемиликтерди жүйөө келтирип, финполиция текшерген учурда 80 миң сом каражат максатсыз пайдаланылгандыгын, Т.Бакировдун Орусия жарандыгы бар экендигин айткан. Ага карабастан биринчи добуш берүүдө Т.Бакировго ишенбөөчүлүк көрсөтүү колдоо таппады. Тактап айтканда депутаттардын аз ганасы добуш берип өтпөй калды. Бирок ал ортодо он минуттук танапис жарыялоону көтөрүп чыгышты. Ошентип он минуттук эс алуу жарыяланып, ал жарым саатка созулду. Танапистен келген депутаттар позицияларын өзгөрттү. Т.Бакировдун темасы кайра коюлуп, анда депутаттардын көпчүлүгү добуш беришти жана Т.Бакировго ишенбөөчүлүк көрсөтүлдү.

Ал эми Төлөн Бакиров өзү мунун саясий оюн деп баалады. Анткени 80 миң сом каражат максатсыз пайдаланылган эмес, ал боюнча түшүндүрмө берилген. 2009-жылы кош жарандуулукка уруксат болгон учурда Орусия жарандыгын алып, кийин муниципалдык кызматка келгенде 2011-жылы кайра тапшыргандыгын билдирди. Ал боюнча тийиштүү документтери жана далилдери бар экенин айтат.