790 Бардыгы /

Мунай экспорттоочу мамлекеттердин уюму (ОПЕК) өндүрүш көлөмүн суткасына жарым миллион баррелге чейин кыскартуу маселесин караштырууда. Бул тууралуу Reuters агенттиги ОПЕК өлкөлөрүндөгү өз булактарына таянып билдирди.

Маалыматка караганда, мындай чара коронавирустун жайылышынан улам мунайга болгон суроо-талаптын төмөндөп кетишине байланыштуу.

ОПЕК+ бирикмеси катары белгилүү Мунай экспорттоочу мамлекеттердин уюму менен Орусия чукул жыйынга 14-15-февраль күндөрү чогулууну пландап жатышат.

2020-жылдын башынан бери мунайдын баасы 10 долларга төмөндөп, учурда бир баррели 56 долларды түзүүдө. Бул ОПЕК өлкөлөрүнүн көбү үчүн балансталган бюджетин сактоого зарыл болгон деңгээлден кыйла төмөн. Талдоочулар Кытайдагы коронавирустан улам 2020-жылдын биринчи кварталында мунайга болгон суроо-талап суткасына төрттөн бир миллион баррелге чейин азаят деп болжолдошууда.

The Wall Street Journal басылмасынын белгилешинче, бааларды түшүрбөй кармап туруу үчүн убактылуу чара катары Сауд Арабиядагы мунай өндүрүшүн суткасына 1 миллион баррелге чейин кыскартуу мүмкүндүгү каралууда. Өз кезегинде Reuters агенттиги бул божомолду текшерүүгө мүмкүн болбогонун билдирүүдө.

www.