726 Бардыгы /

3-мартта Чымкентте убактылуу камоо жайынын алдына чогулган ондой активист Жакишевден башка дагы саясий туткундарды түрмөдөн бошотууну талап кылышты.

Активисттер ал жерден “Назарбаевдин ысымдары алынып салынсын!” деген уран менен 22-февралда жалгыз пикетке чыгып, тынч жыйын өткөрүү тартибин бузуу айыбы менен 10 суткага камалган жергиликтүү тургун Мурат Байдаулетовду тосуп алышты.

Тергөө абагынын алдына чогулгандар Жакишевден башка да саясий туткундар көп экенин айтышып, аларды бошотууну талап кылышты.

Бул арада Батыш Казакстан облусунун борбору Орол шаарында да үч киши акимчиликтин алдына келип, саясий себептерден улам соттолгондорду бошотууну, активисттерди куугунуктоону токтотууну сурашты.

Казакстандын Семей шаардык соту 3-мартта ”Казатомпром” компаниясынын мурдагы жетекчиси Мухтар Жакишевди мөөнөтүнөн мурда шарттуу бошотуу тууралуу анын адвокатынын арызын канааттандырган. Жакишев 2009-жылы коррупция үчүн айыпталып, камакка алынган. Сот аны ошол жылы 14 жылга түрмөгө кескен. Муктар Жакишевдин жактоочулары ал мурдагы банкир, Казакстандын биринчи президенти Нурсултан Назарбаевдин эң башкы саясий душманы, бозгундагы саясатчы Мухтар Аблязов менен дос болгону үчүн гана камалганын айтып келишет.

Казакстан укук коргоочуларынын эксперттик кеңеши түзгөн тизмеге ылайык, учурда 12ден кем эмес киши саясий себептерден улам түрмөдө отурат.

www.