Китеп Кытайдын Шинжаң провинциясындагы «кайра тарбиялоо» лагеринде кармалган кишилердин жашоосун баяндайт. Китептин авторунун айтымында, чыгарманы жазууга күбөлөрдүн көрсөтмөлөрү, активист Серикжан Билаштын архивиндеги видеожазуулары түрткү болгон. – Китепте фактылар гана сүрөттөлдү. Этникалык аз улуттардын тагдырын жана Кытайдагы адам укуктарынын бузулушун иликтөө зарыл, – деди Турарбек Кусаинов.

Китеп «Казакстандагы парламентаризмди өнүктүрүү фондунун» колдоосу менен басылып чыкты.

Эл аралык укук коргоо уюмдары жана бир катар Батыш өлкөлөрү Кытай бийлиги Шинжаңдагы уйгур, казак жана кыргыздар сыяктуу ислам динин карманган улуттук азчылыктарды «саясий тарбия лагерлеринде» негизсиз кармап турганын билдирип келишет. Буга чейин Кытайдан келген ондогон казактар менен кыргыздар Шинжаңдагы туугандары лагерде кармалып турганын айтып, бийликке кайрылышкан.

Бирок Кытай бийлиги Шинжаңдын тургундары диний же саясий көз карашы үчүн куугунтукталып жатканын четке кагып, алар кармалган лагерлерди кесипке үйрөтүүчү борборлор катары мүнөздөп келатат. Ошондой эле Шинжаңдагы чараларды экстремизмди ооздуктоо аракети менен түшүндүрүп жүрөт.