1,012 Бардыгы /

Сауд Арабиясы апрелден тарта мамлекеттик «Saudi Aramco» компаниясы өндүргөн мунайдын бир баррелин 6-8 долларга арзандата турганын билдирди.

Падышалык мындан тышкары мунай өндүрүшүн көбөйтүп, суткасына 10 млн. баррелге чейин кара май өндүрүүнү көздөйт. «Bloomberg» агенттиги жана эксперттер мамлекеттик «Saudi Aramco» компаниясынын бул аракетин «соода согушу», «Европадагы, Азиядагы жана АКШдагы кардарларды өзүнө тартып кетүү далалаты» деп баалап жатышат.

Саудия мындай билдирүүсүн Венадагы сүйлөшүү үзгүлтүккө учурагандан кийин, 7-мартта таратты.

Коронавируска байланыштуу дүйнөдө өндүрүштүн ыргагы солгундап, натыйжада мунайга муктаждык азайып, анын баасы төмөндөгөн. Ошондон улам ири мунай экспорттоочу өлкөлөрдүн өкүлдөрү Венага чогулуп, өндүрүштүн көлөмүн дагы азайтууну макулдашмак. Орусия «ага негиз жок» деп бул сунушка көнгөн жок.

Жума күнү сүйлөшүүдөн майнап чыкпаган соң мунайдын баасы 8% ылдыйлап, баррели 45 долларга түшүп кетти. Сауд Арабиясынын кадамынан кийин кара майдын дагы арзандашы күтүлүүдө.

Москванын Венадагы позициясына бардык эле мунай копаниялары макул эмес. «Лукойлдун» теңшерик ээси Леонид Федун «The Bell» интернет-порталы менен болгон маегинде Венадагы ажырымдан кийин Орусия күнүнө 100-150 млн доллар жоготорун билдирди.

www.