708 Бардыгы /

Ооганстанда президент Ашраф Гани жана аткаруу бийлигинин башчысы Абдулла Абдулла 9-мартта өз-өзүнчө инаугурация өткөрүп, өздөрүн президент деп жарыялашты.

Кабулдагы эки саясатчынын жанаша турган кеңсесиндеги өз-өзүнчө ант берүү аземдерине жүздөгөн адамдар катышты. АКШнын Ооганстан боюнча атайын чабарманы Залмай Халилзад жана АКШ башында турган эл аралык күчтөрдүн кол башчысы, генерал Скотт Миллер Ганинин ант берүү аземине катышты. Мунун алдында атаандашкан саясатчылар бийлик бөлүштүрүүгө байланыштуу орток пикир таба алган эмес.

Ооганстанда президенттик шайлоо былтыр сентябрда өткөн. Өткөн айда гана Көз карандысыз шайлоо комиссиясы добуш берүүнүн расмий жыйынтыгын жарыялаган. Ага ылайык, Ганини шайлоочулардын 50,64 пайызы колдоп, экинчи мөөнөткө шайланган.

Абдулла Абдулла болсо 39,52 пайыз добушка ээ болгон. Бирок ал добуш берүүнүн жыйынтыгын тааныган эмес жана «добуштарды жапырт уурдоо болду жана мыйзам бузуу менен коштолду» деп сынга алган.

2014-жылы өткөн президенттик шайлоодо да Абдулла Абдулла менен Ашраф Гани «ит жыгылыш» болуп калганда Кошмо Штаттардын ортомчулугу менен эки саясатчынын ортосунда бийлик бөлүштүрүлгөн. Ага ылайык, Ашраф Гани президент, ал эми Абдулла Абдулла Бириккен улуттук өкмөттүн башчысы же башкы аткаруучу болууга көнүп, мунаса табылган эле.

www.