1,671 Бардыгы /

Коронавируска байланыштуу Сузак районуна караштуу эки айыл карантинге алынды. Бул тууралуу Сузак районунун акими Эрмекбай Омошев  билдирди.

Анын айтымында, Сузак районуна өзгөчө кырдаал режими жарыяланып, анда Благовешенка айылы менен Кызыл-Суу айыл аймагынын Бостон айылына карантин жарыяланды.

«Тилекке каршы коронавируска күмөндүүлөр биздин тургундар болду. Ошол жашоочулар менен байланышта болгон жарандар медицина кызматкерлеринин көзөмөлүндө болуп жатат. Ошондуктан карантин жарыяланды», – дейт Омошев.

Кошумчалай кетсек, коронавирус Кыргызстанда катталып, ал сузактык 3 адам экени бүгүн, 18-мартта маалым болду.

Бейтаптар 12-мартта Сауд Арабиядан кичи ажылыктан кайтып келишкен. Келгенден кийин текшерүүдөн өтүп, дарыгерлердин көзөмөлү менен үй карантинге алынган. Умрадан кайтып келген Жалал-Абаддын Сузак районундагы Благовешенка айылынын жашоочусунун дене табы 16-мартта көтөрүлгөн. Аны ооруканага жеткиришип, алынган анализи Ош шаарына жөнөтүлгөн.

Аны менен бирге Сауд Арабиядан 8 адам кайтып келгени аныкталып, алардын ичинен 3 адамдан коронавирус чыкты.

“Аймак”