«Интерньюс» уюмунун Тажикстандагы өкүлчүлүгү Нооруз майрамына карата жарыяланган каникулдарга чейин эле кызматкерлерин аралыктан иштөө тартибине өткөргөн. Өкүлчүлүктүн жетекчиси Абдумалик Кодиров мындай иштөө режими 15-апрелге чейин созуларын, зарылдык жаралса андан да узартылышы мүмкүндүгүн билдирди.

ЕККУнун Душанбедеги программалык кеңсеси да кызматкерлерин аралыктан иштөөгө өткөргөн. Ушу тапта кеңсеге уюмдун бир нече кызматкери гана келип жатканы айтылууда.

Ал ортодо Тажикстандагы АКШнын жана Германиянын дипломатиялык өкүлчүлүктөрү жарандарды кабыл алууну жана виза берүүнү убактылуу токтотушканын билдиришти.

«Азыр кызматкерлердин бардыгы эс алууда. Аларды аралыктан иштөө тартибине өткөрүү маселеси кийинки жумада каралышы мүмкүн. Азыр жарандарды жана америкалык виза алуу боюнча арыздарды кабыл алууну убактылуу токтоттук» — деди АКШ элчилигинин коомчулук менен байланыш бөлүмүнүн координатору Дилбар Рузадорова.

Катардын, Орусиянын жана Кыргызстандын Душанбедеги элчиликтери кадимки режимде иштеп жатышканын билдиришти.

«Биз Тажикстандын тиешелүү түзүмдөрү менен дайыма байланыштабыз. Бактыга жараша, бул өлкөдө коронавирус жуктургундар каттала элек. Ошондуктан кадимки режимде иштеп жатабыз», — деди Кыргызстандын элчиси Жаныш Рустенбеков.

Тажик бийлиги өлкөдө коронавирус жуктуруп алгандар катталбаганын, мындан улам карантин же өзгөчө кырдаал киргизүү зарылдыгы жок экенин билдирүүдө.