Нааразы болгон жумушчулардын арасында компаниянын мурдагы кызматкерлери да бар. Алардын айтымында, ишкана жетекчилиги жумушчулардан ай сайын социалдык фондго деп акча кармап калып, бирок каражатты ал мекемеге которбой келген.

«Компания ай сайын пенсиялык жана социалдык фондго деп бизден акча кармап калчу. Бирок ал каражат аталган мекемелерге жетчү эмес экен. Мындан улам азыр мамлекеттен жөлөк пул, насыя ала албай кыйналып жатабыз. Бизге кармап калган акчаны кайтарып беришсин. Карантинде жумуш жок, балдарыбыз ачка калды», — деди компаниянын мурдагы жумушчуларынын бири.

Эмгек инспекциясынын Караганды облустук башкармалыгы жумушчулардын арызы каттоого алынганын, бирок өлкөдөгү өзгөчө абалга байланыштуу текшерүүгө мүмкүн болбой жатканын билдирди.

— Дүйшөмбү күнү «КазПолиметалл» компаниясы алты миллион теңге карызын төлөп берди. Акырындык менен кутулуп жатат, азыр 74 миллион теңгенин 28 миллиону калды. Жалпысынан 279 жумушчу карызын доолап жатат. Алардын акыркы кайрылган 12сине 42 500 теңгеден мамлекеттик жөлөк пул берилди», — деди мекеменин өкүлү.

Азырынча «КазПолиметалл» компаниясынан бул боюнча комментарий алууга мүмкүн болгон жок.