1,093 Бардыгы /

Казакстанда камакта отурган активист Асет Абишев карцерден түрмөнүн санитардык бөлүгүнө которулду.

Алматы облусунун Заречный айылындагы абак жетекчилиги бул маалыматтын чын экенин тастыктады. Мекеме соттолуучунун абалы дурус экенин билдирди.

30-апрелде Асет Абишевдин адвокаты “Фейсбуктагы” барагына: “Кечээ кечинде аны (Асет Абишевди) санитардык бөлүккө которушту. Ал 7 күндөн бери кургак ачкачылык кармап жаткан. Ал карантин маалында коргонуу каражаттарын талап кылгандыгы үчүн эки жолу – 15, анан 10 суткага жазаланган”, – деп жазган.

8-апрелде адвокат Абишев коронавируска байланыштуу коопсуздук чараларын күчөтүүнү, соттолгондорду беткап менен камсыздоону, дезинфекция жасоону талап кылгандыгы үчүн 15 суткага карцерге камалганын билдирген. Бирок Алматы облусунун атайын прокурорунун орун басары Ербол Керимбек Абишев жанында мобилдик телефон алып жүргөндүгү үчүн карцерге которулганын белгилеп, коронавируска байланыштуу колонияда коопсуздук чаралары көрүлүп жатканын айткан. Кийин ал дагы он суткага тартип камерасына камалган.

42 жаштагы Асет Абишев 2018-жылы “Тыюу салынган уюмдун ишине катышуу” айыбы менен төрт жылга соттолгон. Активисттин тарапташтары ал чет өлкөдө жашаган мурдагы банкир, казак бийлигин сындап жүргөн Мухтар Аблязовдун “Казакстандын демократиялык тандоосу” кыймылын колдогону үчүн куугунтукталууда деп эсептешет. Казакстанда бул кыймыл экстремисттик уюм деп табылган.

WWW.