929 Бардыгы /

Коронавирустун жаңы түрү Алматыдагы коркунучтуу инфекциялар  лабораториясынан тараган эмес. Бул тууралуу АКШнын Ооруларды көзөмөлдөө жана профилактика жүргүзүү борборунун (Center for Disease Control and Prevention, CDC) өкүлү билдирди.

CDC борборунун аймактык директору Дэниел Сингер 6-майда телефон аркылуу брифинг өткөрүп, журналисттердин суроолоруна жооп берди. Ал вирус Алматы лабораториясынан таралышы мүмкүн эмес экенин айтты. Муну менен ал кытай сайттарынын биринде “вирус Казакстандагы “америкалык лабораторияда” даярдалып, Кытайга алынып келинген болушу ыктымал” деген билдирүүнү четке какты.

— Вирус чыгаруу үчүн лабораторияга алдыңкы технологиялар жана төртүнчү деңгээлдеги коопсуздук керек. Менимче, Алматыдагы лаборатория үчүнчү деңгээлдеги коопсуздукка ээ. Андыктан, бул лаборатория мындай вирусту түзүүгө кубаты жетет дегенге ишенбейм, — деди Дэниел Сингер.

CDC өкүлү лаборатория америкалык экенин да четке какты. Сингер АКШ өкмөтү бул объектини курууну каржылаганын, CDC жабдууларды берип, кызматкерлерди окутканын белгиледи. Ал Алматыдагы лабораторияда бир да америкалык жаран иштебей турганын кошумчалады.

— Вирустун Алматыдагы лабораторияда пайда болушу жөнүндөгү маселеде мен АКШны сындоону эмес, Казакстан суверенитеттүүлүгүнө чабуул жасоону көрүп турам. Себеби бул алардын объектиси жана лабораториясы, кандай иликтөө жүргүзүүнү алар өзүлөрү чечет.

Коронавирустун жаңы түрү Алматыдагы лабораторияда тараган деген божомолду Sohu.com жарыялаган. Бул маалыматтык басылма эмес, жалпы технологиялык плафторма. Мындай платформага чыккан маалымат кытай бийлигинин расмий көз карашын билдирбейт. Буга чейин сайтта Казакстан жана Кыргызстан жайгашкан аймак мурда Цин империясына караштуу болгон деген маанайдагы макала жарыяланган.

АКШ бийлиги коронавирустун жаңы түрү Кытайдын Ухань шаарындагы лабораториядан жаңылыштык менен тарап кеткен болушу мүмкүн экенин билдирип келет.

WWW.