1,301 Бардыгы /

АКШнын Ооруларды көзөмөлдөө жана профилактика жүргүзүү борбору (Center for Disease Control and Prevention, CDC) Борбор Азия өлкөлөрүн калк арасында коронавируска тест жүргүзүүнү көбөйтүүгө чакырат.

CDCнин Борбор Азия боюнча аймактык директору Дэниел Сингер 6-майда кеңири тест жүргүзүү менен вирустун очогун жана канчалык деңгээлде жайылганын аныктоого боло турганын айтты.

Коронавируска байланыштуу CDC Борбор Азияга алдыдагы эки жылда 6,8 миллион долларлык жардам берет.

Даниел Сингер: «Жардам жабдык сатып алууга, окутууга, ооруну аңдап түшүнүү боюнча кызматташтыкты жолго коюуга жана пандемияны жеңгиче аймактагы саламаттык сактоо министрликтери өз жарандарын коргоого чара көрө алышы үчүн бөлүнөт», – деп билдирди.

Бул – АКШ өкмөтү жардамга берчү каражаттан тышкары, өлкөнүн медициналык муктаждыгына карай бөлүштүрүлчү көмөк. Кыргызстанга 1,3 миллион долларлык түрдүү медициналык каражаттар берилет.

АКШнын бул жардамы Өзбекстанга (2,07 млн. доллар), Казакстанга (1,6 млн. доллар) жана Тажикстанга (1,6 млн. доллар) да үлөштүрүлөт.

Ал эми Түркмөнстан тууралуу сөз козголгон жок. Түркмөн бийлиги өлкөдө коронавирус жок экенин билдирип келет.

АКШнын ооруларды көзөмөлдөө жана алардын алдын алуу боюнча борборлору жалпы дүйнөдөгү коронавируска каршы аракеттерге бардыгы 800 миллион доллар бөлгөн.

WWW.