711 Бардыгы /

Токтогул районуна караштуу Терек-Суу айылынын тургуну, 38 жаштагы Мекен Абдалиев акыркы үч жылдан бери Орусияда жеке менчик клиникада иштеп келүүдө. Ал пандемиядан улам кыйналып жаткан жердештерине көмөк берүү үчүн бир айга келген. Район борборунан 20 чакырым алыстыкта жайгашкан Терек-Суу айылындагы №6 үй-бүлөлүк дарыгерлер тобунда иштеп жаткан микрохирург менен байланышып көрдүк.

Ыктыярчы дарыгер Мекен Абдалиев айылдык ооруканада иштеп жатканына 7 күн болду.  Өлкөдөгү азыркы кырдаал анын мекенге кайтып келүүсүнө түрткү болгон. Москвадан айылдаштарына бир айга көмөк берүү үчүн келген дарыгер дем алышсыз иштеп жатат. Ал түшкө чейин эле 30дан ашык бейтапты кароодон өткөрдү. Сыртта кезек күтүп тургандар да бир топ.

“Кайрылгандар күндөн-күнгө көбөйүүдө. Түшкө чейин эле 30дан ашык адамды кароодон өткөрүп жатам. Анын арасынан 4-5и оор абалдагы жарандар. 

Кесибим боюнча микрохирургмун. 2004-жылдан 2017-жылга чейин республикалык ооруканада эмгектенгем. Андан бери Орусияда жеке менчик клиникалык ооруканада өз адистигим боюнча иштеп келе жатам.

Алгач Бишкекке барасың деп айтышкан. Кийин элчилик менен сүйлөшүп, Токтогулга, өз айылыма барайын деп суранып келдим. Анткени Москвадагы терек-суулук мигрант балдардын ата-энелери да бул жакта ооруп калган экен. Айыл жергесинде врачтар деле калбай калыптыр. Бишкекте ооругандар көп, ошого жараша врачтар да бар деп мен айылга келдим” – дейт дарыгер Мекен АБДАЛИЕВ.

Ыктыярчынын белгилөөсүндө бул жакта атайын адистешкен кийимдерден аксоо жок. Медициналык жабдуулар да алынып жатат. Деген менен Абдалиев айылдык ооруканалардагы шарт көңүл жылытпастыгын айтат. Айылдагы үй-бүлөлүк дарыгерлер тобунда 3 дарыгер бар. Алардын бири илдетке кабылып, дарыланып жатса, бирөөсү кырсыктап ал да ооруканада. Ыктыярчынын мекенге алыстан келгени айылдык ооруканадагы түйшүктү бир топ эле азайткандай. Айыл тургундары да дарыгерге ыраазычылыгын билдиришүүдө.

Бүбүсара ОРОЗАЛИЕВА, “Аймак”