849 Бардыгы /

ЖАЛАЛ-АБАД. Базар-Коргон районунда Кытайдан алган карызды төлөө үчүн элдик фонд түзүлдү.

Базар-Коргон районунда жергиликтүү тургундар Кытайдан алынган карызды төлөө максатында элдик фонд ачып, каражат чогултушууда. Бул тууралуу уюштурулган фонддун төрагасы Курсантбек Акылбек уулу билдирди.

 «Мен учурда Базар-Коргон районунун Могол айыл аймагына караштуу Правда айылындагы Жуманалы атындагы №15 орто мектебинде математика мугалим болуп 5 жылдан бери иштеп келе жатам. Жаштардын эртеңки келечеги үчүн тынчсызданып, ушул жылдын 2-октябрынан тарта айыл тургундары банктан эсеп ачып, Кытайдан алган карызды төлөө максатында каражат чогултууну колго алдык. Биздин бул кадамды кубаттагандар да, тескерисинче сындагандар да бар. Көбүнчө чет жерде иштеген мигранттар, өзүмдүн кесиптештерим колдоо көрсөтүшүүдө”,- дейт фонддун уюштуруучусу.

Аталган фонд тууралуу социалдык тармактарга жайылтылып, колдоо көрсөтүүчү тараптар менен байланыш жүрүүдө.

Курсантбек Акылбек уулу: “Элдин ишенимин актоо өтө жоопкерчиликтүү. Ар бир түшкөн каражат боюнча маалыматтар берилүүдө. Каражат чогулганда жеке өзүбүз элдин салымын мамлекеттик тиешелүү жетекчилерге тапшыралы деген пландарыбыз бар. Ушул тапта банктык эсептер иштеп жатат», – деп кошумчалады.

Белгилей кетсек, элдик фонддун уюштуруучусу К. Акылбек уулу 1991-жылы туулган, ЖАМУну аяктаган,кесиби боюнча мугалим.

Байканбек САДЫКОВ, “Аймак”