684 Бардыгы /

Өзбекстандык журналист Бобомурод Абдуллаев өзүнө карата ачылган кылмыш иши токтотулганын 23-октябрда “Фейсбукта” кабарлады. Ошондой эле ага чет мамлекетке чыгуу үчүн жалпы жарандык паспорт да берилди.

Бир апта мурда президент Шавкат Мирзиёев журналист Абдуллаевге Ташкенттен үч бөлмөлүү батир тартуулаганы кабарланган.

9-августта Кыргызстандын Улуттук коопсуздук боюнча мамлекеттик комитети (УКМК) Өзбекстандын өтүнүчү менен Абдуллаевди Бишкекте кармап, 22-августта Ташкентке өткөрүп берген.

Журналист Ташкентке жеткирилгендин эртеси жүрүм-турум эрежелерин бузбоо жөнүндө тилкаттын негизинде бошотулган.

Азырынча Өзбекстанда журналистке кандай айыптар коюлганы белгисиз. Бул тууралуу расмий маалымат жок.

Журналист өзү Бишкекте кармалгандан кийин мекенинде «Кара Мерген» деген каймана ысым менен өкмөткө каршы макалаларды жазган деп айыпталып жатканын билдирген.

Бобомурод Абдуллаев 2017-жылы Өзбекстанда конституциялык түзүлүштү кулатуу максатында кутумга барган деп шек саналып камакка алынган. 2018-жылы май айында сот залынан бошотулган.

WWW