696 Бардыгы /

Казакстанда балдар үйлөрүнүн бүтүрүүчүлөрү көптөгөн жылдар бою мыйзамда каралган мамлекеттик турак-жайга кезек күтүп келишет.

Алматынын тургуну Людмила Амбросова мыйзам боюнча берилиши керек болгон батирди төрт жылдан бери ала албай жүрөт. Алар күйөөсү экөө тең балдар үйүндө тарбияланышкан. Бүгүнкү күндө үй-бүлө бир жаштагы баласы менен 15 чарчы метр бөлмөнү ижарага алып жашап келет.

«Райондук акимчиликке кайрылган сайын «Барып иштегиле» деген жооп угам. Мен балам менен иштей албайм десем угушпайт. «Колу-бутуң барбы, иште» дей беришет», –​деди Людмила.

«НеМолчиСирота» коомдук фондунун жетекчиси Руслан Турысбектин айтымында, өлкөдө мындай тагдырдагы адамдар миңдеп саналат.

«Алар жылдап кезекте турушат. Жакында эле балдар үйүнүн бүтүрүүчүлөрүнүн бири мамлекеттик турак-жайга жетпей каза болду — ал өз өмүрүн кыйды. Бул маселе боюнча бардык бачкычтарга кат менен кайрылдык, эч кандай майнап чыккан жок», — деди фонддун жетекчиси.

Күн мурун Курулуш, турак-жай жана коммуналдык чарба иштери боюнча комитеттин башчысы Мархабат Жайымбетов 15 жылдын ичинде курулган турак-жайдын саны 2,5 эсеге көбөйгөнүн билдирди. Анын айтымында, бул тармакка салынган инвестиция көлөмү алты эсеге өстү.

Бүгүнкү күнгө карата Казакстанда турак-жайга муктаж жарым миллиондон ашык жаран кезекте турат. Алардын 60 миңден көбүн ата-энесинин камкордугусуз калган балдар менен жетимдер түзөт.

WWW