813 Бардыгы /

Тажикстандын Социал-демократиялык партиясынын төрагасынын орун басары дайынсыз болуп жатканына он күндөн ашты. Тажикстан ИИМи саясатчыны издеген жок: Одинаевдин жакындары анын жоголгону боюнча милицияга арыз менен кайрылган эмес.

Махмурод Одинаев 16-ноябрда азык-түлүктүн кымбатташына каршы митинг өткөрүүгө уруксат берүү тууралуу өтүнүч менен Душанбе шаарынын мэриясына кайрылгандан бери дайынсыз болууда. Саясатчынын жакындары ал 20-ноябрда жоголгонун, милицияда сурак беришкенин билдиришүүдө. Тажикстан ИИМи бул маалыматты четке какты.

Министрликтин басма сөз катчысы Нусратулло Махмудзоданын билдиришинче, Махмурод Одинаевди издешкен жок, себеби жакындары анын жоголгону боюнча милицияга арыз менен кайрылышкан эмес.

-Биз менен эч ким байланышкан жок. Буга чейин анын уулуна кылмыш иши козголгонун жарыялаганбыз, болду, – деди Нусратулло Махмудзода.

24-ноябрда Тажикстандын Ички иштер министрлиги (ИИМ) саясатчынын уулуна каршы «Бейбаштык» беренеси боюнча кылмыш иши козголгонун билдирген. Мекеменин маалыматына караганда, Ризоев мас абалында шаардагы ресторандардын биринин жанында 2002-жылы туулган кызды сабаган. Ресторандын күзөтчүсү аны токтотууга аракет кылып, жыйынтыгында экөө мушташып кеткен. Соттук-медициналык актыга ылайык, Ризоев жеңил жаракат алган.

Быйыл октярда Одинаев белгисиз адамдар уулуна кол салганын айтып чыккан. «Бийлик мындай жол менен мени жана мага окшогон бийликти сындап жүргөндөрдү коркуткусу, саясий ишмердүүлүгүбүздү токтоткусу келип жатат», – деген ал.

Польшадагы тажикстандык оппозициячылар түзгөн «Саясий туткундарды коргоо комитети» Махмурод Одинаевди Тажикстандын күч түзүмдөрүнүн кызматкерлери уурдап кеткен болушу мүмкүн экенин билдирди. Азырынча Душанбе комитеттин бул билдирүү боюнча комментарий бере элек.

Тажикстан социал-демократиялык партиясынын жетекчилиги аларда саясатчынын кайсы жерде экендиги тууралуу маалымат жок экенин билдирген. Бул партия – Тажикстандагы жалгыз оппозициялык бирикме. Партия октябрда өткөн президенттик шайлоого бойкот жарыялаган.

WWW