762 Бардыгы /

Эл аралык укук коргоо уюмдары Казакстандын Европа биримдиги баштаган өнөктөштөрүн өлкөдөгү укук коргоочуларга карата «коркутуулар менен репрессияларды» токтотуу талабы менен Нур-Султанга кайрылууга чакырышты.

Amnesty International, Front Line Defenders, Human Rights Watch (HRW) жана International Partnership for Human Rights (IPHR) уюмдарынын 3-декабрда жарыяланган билдирүүсүндө Казакстандын салык органдары ондон ашык жергиликтүү бейөкмөт уюмду каржы отчетторундагы «мыйзам бузуулар» үчүн айып пул салып, куугунтуктап жатканы жазылган.

«Мындай аракеттер 2021-жылдын 10-январында өтө турган парламенттик шайлоого коомдук көзөмөл жүргүзүүгө тоскоолдук кылуу аракети болушу мүмкүн. Казакстандын бийлиги бул негизсиз дооматтарынан тез арада баш тартып, адам укуктары боюнча эл аралык милдеттенмелерин аткарышы керек. Казакстандын эл аралык өнөктөштөрү Нур-Султанды укук коргоо уюмдарына карата коркутууларды жана репрессияларды токтотууга чакырышы керек», — деп жазылган билдирүүдө.

Апта башында Казакстандагы бир нече укук коргоо жана жарандык уюмдар салык органдарынын «чабуулуна» кабылышканын айтып, муну парламенттик шайлоонун алдындагы «кысым» деп сыпатташкан. Алардын айтымында, октябрь-ноябрь айларында өлкө боюнча кеминде 13 уюм салык отчетун туура эмес толтурушканы боюнча эскертүү алышкан. Уюмдар мындай айыптоолорду негизсиз деп аташкан.

WWW