654 Бардыгы /

Кашкадарыя облусунда суюлтулган газ өндүрө турган Uzbekistan GTL заводунун курулушуна катышып жаткан Nuriston Teks Group жоопкерчилиги чектелген коомунун ондогон кызматкери нааразылык уюштурушту.

Жумушчулар эки айдан бери айлык акы төлөнө элек экенин билдиришүүдө.

– Келишим боюнча ар айдын башында айлык алышыбыз керек. Бирок биз октябрь, ноябрь айларынын айлыгын ала элекпиз. Бухалтерияга кайрылсак, Enter Engineeing акча которо элек экенин билдиришти. Ошондуктан 8-декабрда жумушчулар чогулуп, маяналарын талап кылышты. Биз айлык акы берилбесе, иш таштай турганыбызды айттык. Бул маселе 15-декабрга чейин чечилерин билдиришкенден кийин гана жумушчулар тарап кетишти, – деди Nuriston Teks Group коомунун жумушчуларынын бири.

Nuriston Teks Group ишканасында 130дан ашуун жумушу иштейт, алар газ куурларын төшөө жана изоляциялоо иштерин аткарышат.

21-октябрда «Uzbekistan GTL» заводун куруп жаткан «Enter Engineering» компаниясынын миңдеген жумушчусу башаламан нааразылык акциясын өткөрүшкөн. Анда 5000дей киши заводдун имаратына күч менен кирип, компьютерлерди, эмеректер менен буюмдарды талкалап кеткен.

Окуя болгон жерге Улуттук гвардиянын, Улуттук коопсуздук кызматынын жана Ички иштер министрлигинин атайын бөлүктөрүнүн кызматкерлери келип, ызы-чуу салган жумушчулардын колун кайрып жатаканаларга камап салышкан.

Жумушчулар иш берүүчү фирма убагында тамак-аш менен камсыз кылбай жатканы аларды аргасыз ушундай митинг уюштурууга түрткөнүн айтышкан.

4 миллиард долларга бааланган Uzbekistan GTL долбоорунда жалпысынан 12 миңдей жумушчу иштейт. Расмий маалымат боюнча ал аймакта синтетикалык суюк отун чыгарган эң эле инновациялык завод болот.​

WWW