786 Бардыгы /

Жалал-Абад шаарынын мэриясынын адиси пневмониядан каза болду. Бул тууралуу аймактык кабарчыга кесиптештери билдиришти.

Маалым болгондой, 61 жаштагы Карим Токторбаев кечээ, 13-декабрда каза тапкан. Ал шаардык мэриясынын Долбоорлорду ишке ашыруу бөлүмүнүн башкы адиси болуп эмгектенчү.

Маркумдун кесиптештери ал өткөн аптада облустук бейтапкананын жугуштуу оорулар бөлүмүнө дарыланып жатканын айтат.

«Кесиптешибиз акыркы учурда башкы адис кызматында эмгектенип жаткан. Өткөн аптада ден соолугу начарлап, ооруканага жаткан болчу. Кечээ түштөн кийин каза болуп калганын уктук. Ушул тапта тажиясы болуп жатат», – дейт маркумдун кесиптеши Эркинбай Абдурасулов.

13-декабрга карата эки киши пневмония илдетинен каза болгон. Бирок бул сандар республикалык ыкчам штабдын маалыматында айтылган жок.

«Кечээ күнү биздин оорукананын жугуштуу оорулар бөлүмүндө дарыланып жаткан эки киши каза болду. Алардын өлүмүнө өпкөнүн кагынуусу (пневмония) себеп болгон. Алар 61 жана 83 жаштагы кишилер болчу. Экөөнү тең каттоого алып, сөөктү туугандарына өткөрүп бергенбиз. Сандар тууралуу да маалыматтар берилген. Бүгүнкү статистикага кошулбай калганы тууралуу маалыматым жок экен», – деди облустук оорукананын башкы дарыгеринин орун басары Мелис Баймуратов.

Эске салсак, буга чейин Долбоорлорду ишке ашыруу бөлүмүн жетектеп келген Садыр Айтбаев да каза болгон.

14-декабрга карата республикалык штаб өлкө аймагында дагы 318 адамдан COVID-19 диагнозу аныкталганын, илдеттен 5 адам каза болгонун, алардын бирөө Бишкек шаарында, экөө Ош облусунда, экөө Баткен облусунда экенин айтты.

WWW