800 Бардыгы /

Жогорку соттун судьясы мыйзамсыз баюуга шек саналып колго түштү. Аны кармаган Улуттук коопсуздук мамлекеттик комитети (УКМК) шектүүнүн аты-жөнүн ачыкка чыгарган жок. Айрым маалымат каражаттары ал судья Камил Осмоналиев экенин жазышты. Бул ысым УКМК жарыялаган инициалга дал келүүдө.

Шектүү Коррупцияга каршы кызмат топтогон фактылардын негизинде колго түшүп, Кылмыш-жаза кодексинин 323-беренеси (Мыйзамсыз баюу) менен сотко чейинки териштирүү башталды.

УКМКнын басма сөз катчысы Рахат Сулайманов “Азаттыкка” төмөнкү маалыматтарды берди:

“Ал киреше булактары жок болсо да көптөгөн кыймылсыз мүлктөрдү, элиталык имараттарды, Ысык-Көлдүн жээгинен престиждүү пансионаттардан коттеждерди, соода борборлорунан коммерциялык объектилерди жана люкс-класстагы автоунааларды сатып алган. Мыйзамсыз тапкан мүлктөрүн башка кишилерге каттаткан, өзү Бириккен Араб Эмираттары, Түркия, АКШ жана мамлекеттердин курорттук аймактарына байма-бай каттап турган фактылар аныкталган”.

Ошондой эле ал коммерциялык ишканалардын бирине биргелешкен ишкерлик жүргүзүү максатында декларацияда көрсөтүлбөгөн 150 миң АКШ долларынан ашык акча каражаттарын бергени тууралуу маалымат бар.

Мындан сырткары, өзүнүн чечими менен Бакиевдин үй-бүлөсүнө тиешелүү мүлктүн бир бөлүгүн улутташтыруу боюнча 2010-жылдагы Убактылуу өкмөттүн Декретин жокко чыгарып, Мамлекеттик казынага көп миллиондогон сом чыгым келтирген. Жогорудагы чечими үчүн улутташтырууга жаткан мүлктүн бир бөлүгүн сый акы катары өзүнө алган.

Шектүү 14-декабрда кармалган. Бишкектин Биринчи май райондук соту 15-декабрда анын бөгөт чарасын карап, тергөө абагына камоо чечимин чыгарды.

“Азаттык” башка маалымат каражаттарында аты аталып жаткан судья Камил Осмоналиевге жана анын жакындарына азырынча байланыша албай жатат. Жогорку соттун басма сөз кызматы маалымат такталгандан соң комментарий берилерин билдирди.

WWW