738 Бардыгы /

Тажикстан президенти Эмомали Рахмон 2020-жылы коронавирус пандемиясына байланыштуу тажик мигранттарынын 80% иш үчүн чет өлкөгө чыга албай калганын билдирди.

Рахмон өлкөнүн парламентине жолдогон кайрылуусунда 460 миң мигранттын ичинен 111 миңи гана чет өлкөгө кеткенин айтты.

Тажик президенти мигранттарга өлкөнүн ичинде, тактап айтканда өнөр жай жана айыл чарба тармагында жумуш орундарын сунуштаса болот деп эсептейт. Мигранттар болсо Орусия менен чек аранын ачылышын күтүшүүдө.

Бул арада Орусия менен Тажикстан бийлиги Иркутскка 400 тажик жаранын жөнөтүү боюнча программа даярдашканы белгилүү болду. Жакын арада мигранттар тобу аталган шаардын курулуш тармагында иштеп баштайт.

Бейрасмий маалыматтар боюнча жыл сайын Орусияга бир миллиондон ашуун тажик жаран иш үчүн барат. Коронавирус пандемиясына байланыштуу жүз миңдеген мигрант чек арадан өтө алган жок.

Тажик өкмөтү былтыр чет өлкөдөн акча которуулар кескин азайып, жакыр үй-бүлөлөрдүн саны көбөйгөнүн мойнуна алды.

WWW