615 Бардыгы /

12-февралда Сох окуялары боюнча Фергана облустук сотунда өткөн отурумда беш жабырлануучу жана бир күбө көрмөтмө берди. Бул тууралуу жергиликтүү басылмалар кабарлашты.

Маалыматка караганда, өз көрсөтмөлөрүндө алар айыпталуучуларды окуя болгон жерден көрүшпөгөнүн билдиришти.

«…Окуя башталгандан көп өтпөй мен жумушка кетип, кечке чейин ошол жерде болгом. Ошондуктан окуя кандай өнүккөнүн көргөн эмесмин. Кыргыздар эки үйдү өрттөн жиберишкенин уккам. Өкмөт ал үй ээлерине жаңысын куруп берди. Мен айыпталуучулардын баарын тааныйм, көбү менен окуучуларым. Аларды окуя болгон жерден көргөн эмесмин. Айыпталуучуларга карата менин эч кандай дооматым жок», — деди жабырлануучулардын бири.

Өткөн жылы 9-ноябрда Фергана облустук сотунда Сох анклавындагы массалык башаламандыктарга катышууга айыпталган 22 кишиге карата сот жараяны башталган. Алардын баары 2020-жылы 31-майда Кадамжайдын Чечме айылы менен Өзбекстандын Сох районунун Чашма айылынын жашоочуларынын ортосунда булак талаштан улам чыккан жаңжалда массалык башаламандыктарга катышкан деп айыпталып жатышат. Аларга «мамлекеттик кызматкерди же башка адамды кызматтык же жарандык милдетин аткаруудан баш тартууга мажбурлоо» жана «массалык башаламандык» боюнча айыптар тагылган.

Расмий билдирүүгө ылайык, башаламандыкка миңден ашык киши катышкан. Күбөлөр анда чогулгандардын саны төрт миңге жакын болгонун билдиришкен. Тараптар бири-бирин көздөй таш ыргытып, эки тараптан бир нече үй өрттөнгөн.

Өзбекстан 187 жараны ар кандай жараат алып ооруканага түшкөнүн, алардын үчөөнө мылтыктын огу тийип, бир нече турак жай өрттөлгөнүн билдирген. Күбөлөр алардын көбү өзбек аскерлеринин элди тынчытып таратуу аракети маалында жабыр тартканын айтышкан. Анда Фергана облусунун акими Шухрат Ганиев Сохко барып, эл менен жолугушуп жатканда кагылышуу болуп кеткен.

Буга аткаминердин нааразылык билдирип, көчөдө топтолгон элге кылган өктөм мамилеси себеп болгону кабарланган. Ал «беш мүнөттө үйүңөргө кирип кеткиле, болбосо мен кайтып барып Кадамжай тараптан жолду жабам» деген. Андан тышкары ачыкка чыгып кеткен аудиодо үнү Ганиевдикине окшош адам «чыр-чатактуу айылдарды Сохтун картасынан чийип салабыз» деп айткан. Облус акиминин мына ушундай мамилесинен улам анклавдын эли аны аскерлер калкалап турганына карабай ташбараңга алууга аракет кылган.

Кыргызстандын Саламаттык сактоо министрлигинин маалыматы боюнча, Сохтогу чатактан Кыргызстан тараптан 25 киши түрдүү жараат алган, эки адам оор абалда ооруканага түшкөн.

Фергана облусунун Сох районунда 80 миңге жакын киши жашайт. Расмий маалыматтарга ылайык, район калкынын 92% тажиктер, 7% кыргыздар жана бир пайызын өзбектер түзөт.

WWW