3,618 Бардыгы /

   Кандай согуш болбосун,  ал жоготуулар менен коштолот эмеспи.  1979-жылдын  25-декабрынан  1989-жылдын 15-февралына чейинки аралыкка созулган Ооган согушунда   Советтер союзу  15 031  адамынан ажыраган.  53 753 адам жарадар болгон, контузияга учурап, травма алган. 417 аскер кызматчысы туткунга түшүп,  дайынсыз жоголгон. Анын 130у советтик аскерлер Афганстандан чыкканга чейин бошотулган.  Башка союздук республикалар сыяктуу эле Кыргызстан да бул согушка  өзүнүн  7141 уулун   узаткан. Анын 252си курман болгон, 586ы майып, 1500дөн ашыгы жарадар  болуп кайткан, төрт адам дайынсыз жоголгон.

  Ош шаардык аскер комиссиараты  751 жоокерди Ооган согушуна жөнөткөн, анын ичинен 19у каза болгон. Азыркы учурда Ош шаарында 400 жакын   Ооган согушунун катышуучулары бар. 

   15-февраль күнү  өлкөбүздүн башка аймактары сыяктуу эле Ош шаарында Оогандан советтик  жоокерлердин чыгарылышынын 32 жылдыгына арналган  салтанаттуу иш-чара уюштурулду. Ага Ооган согушунун ардагерлери,  бул согушта курман болгон  жоокерлердин үй-бүлөлөрү жана аскер бөлүктөрүнүн жоокерлери катышты.

   Ооган согушунда курман болгон жоокерлерге арналып тургузулган эстеликке гүлчамбарларды коюу жана шейит кеткендердин арбагына куран түшүрүү менен  башталган бул иш чарада  Ош шаарынын вице-мэри Эмил Шадыханов, Ооган согушунун ардагерлеринин Ош шаардык төрагасы  Какан Эралиев,  Россиянын Ош шаарындагы консулу  В.Свистин,  Ош шаардык кеңештин Төрагасынын орун басары  Б. Каналиев, Ош шаарындагы  аскер жана чек ара бөлүктөрүнүн жетекчилери  чыгып сүйлөштү.

     Алар  ошол кездеги өлкөнүн коопсуздугун сактап калуу үчүн болгон согушка катышкан көп улуттардан турган советтик  жоокерлердин    эрдиктери  жана    интернационалист  жоокерлердин эл достугун чыңдоодогу  жарандык активдүүлүгү жана Баткен согушундагы каармандыктары  тууралуу баяндама жасашты.  Жаш муундардын мекенчилдикке тарбиялоодо эрдиктин жана  каармандыктын үлгүсү  болгон Афган ардагерлеринин ролун баса белгилөө менен, алар  ар дайым мамлекет жана  жергиликтүү бийлик тарабынан  камкордукка алынууга тийиш экендигине токтолушту. 

     Иш-чаранын жүрүшүндө  бир катар Ооган согушунун ардагерлерине  Ош шаарынын мэриясынын жана  КР Өкмөтүнүн Ош облусундагы ыйгарым укуктуу өкүлчүлүгүнүн Ардак грамотасы жана материалдык сыйлыктар ыйгарылды.

    Салтанаттуу иш-чаранын кийинки бөлүгүндө курман болгон  интернационалист  жоокерлердин урматы үчүн  аскер бөлүктөрүнүн жоокерлери эстеликтин жанынан салтанаттуу марш менен өтүштү.   

   Иш-чара мэрия тарабынан уюштурулган  сый тамак жана шаардагы «Келечек»  балдардын чыгармачылык үйүнүн тарбиялануучуларынын  тематикалык концерти менен жыйынтыкталды.

Төлөнбай АБДЫРАЗАКОВ, “АЙМАК”