963 Бардыгы /

ЖАЛАЛ-АБАД. 2021-жылдын 16-февралы күнү Тогуз-Торо районунун Каргалык айылында турак үйдүн короосунда токтоп турган күйүүчү май ташуучу автоунаанын цистернасы ширетүү аркылуу оңдоп-түзөө учурунда жарылып кеткен. Бул тууралуу Тогуз-Торо району боюнча ӨК бөлүмүнүн Өрт өчүрүү жана алдын алуу бөлүмчөсүнүн башчысы улук лейтенант Анаркул уулу Бакай билдирди.

Маалыматта айтылгандай кырсык катталган жерге Тогуз-Торо району боюнча ӨК бөлүмүнүн өрткө каршы-куткаруу бөлүгүнүн 1 өрт өчүрүүчү автоунаасы чыгып, жетип келгенде Камаз үлгүсүндөгү күйүүчү май ташуучу автоунаасын ширетүү аркылуу оңдоп-түзөө учурунда жарылуу болгондугу, өрт чыкпагандыгы жана жарылуудан оңдоо иштерин жүргүзүп жатышкан 2 жаран жабыркагандыгы аныкталган жана жабыркаган жарандар медициналык тез жардам кызматына өткөрүлүп берилген.

Жарылуунун натыйжасында жакынкы турак үйдүн да эшик-терезелеринин айнектери талкаланып, чатыры да жабыркаган жана күйүүчү май ташуучу автоунаанын цистернасы ортосунан айрылып калган.

Тогуз-Торо району боюнча Өзгөчө кырдаалдар бөлүмү жарандарды автоунааларды ширетүү аркылуу оңдоп-түзөтүү учурунда өрт коопсуздук эрежелерин сактоону эскертет. 

Байканбек САДЫКОВ “АЙМАК”