1,095 Бардыгы /

«Эркин Европа/Азаттык үналгысы» (ЭЕ/АҮ) медиакорпорациясы Орусия бийлигинин «Свобода» радиосу менен «Настоящее время» телеканалдарына карата аракеттерине байланыштуу Адам укуктары боюнча Европа сотуна кайрылды.

Орусия бийлиги «чет элдик агент» мыйзамынын катаал чектөөлөрүн сактаган жок деген доо менен «Эркин Европа/Азаттык» үналгысынын орус тилдүү кызматына карата жүздөгөн административдик протоколдорду түзгөн. Алардын айрымдары боюнча соттор айып пул салуу тууралуу чечимдерди кабыл алган.

Адам укуктары боюнча Европа сотуна жолдонгон кайрылууда административдик протоколдор боюнча сот чечимдерин аткарууга мораторий киргизүү каралган шашылыш камсыздандыруу чараларын көрүү өтүнүчү жазылган. Аталган соттун регламентине ылайык, сот уруксат берсе камсыздандыруу чаралары иш боюнча акыркы чечим кабыл алынганга чейин күчүндө болот.

Мындан тышкары кайрылууда орус бийлигинин мындай аракети Адам укуктары боюнча Европа конвенциясынын 10-беренесинде каралган сөз эркиндигине болгон укукту буза турганы белгиленген.

«Камсыздандыруу чаралары киргизилбесе медиакорпорация жана анын башкы директору чоң чыгымдарга дуушар болушу мүмкүн. Мындан тышкары мунун кесепеттери Орусиядагы башка көз карандысыз ЖМКларга терс таасирин тийгизиши ыктымал. Адам укуктары боюнча Европа сотунун тарыхында бийликтин ЖМК эркиндигине кийлигишүүсүнө байланыштуу камсыздандыруу чаралары киргизилген учурлар болгон», — деп жазылган кайрылууда.

2017-жылы Орусиянын «Роскомнадзор» мекемеси ЭЕ/АҮ медиакорпорациясынын «Америка үнү», «Свобода» радиосу өңдүү орус тилдүү редакцияларын «чет элдик агент» деп тапкан. Мындан соң орус бийлиги «чет элдик тыңчы» тууралуу мыйзамды 390 жолу бузду деген жүйө менен медиакорпорацияга дээрлик 1 миллион доллар өлчөмүндө айып пул салган. РСЕ/РС бул чечимдерди Орусиянын Конституциясын, ЖМКлар тууралуу мыйзамын жана медиа чөйрөдөгү атаандаштык эрежелерин бузуу деп эсептеп, сотко кайрылган. Бүгүнкү күнгө карата Москванын Тверь райондук соту уюмдун 72 арызын карап, өтүнүчтү канааттандырган жок.

Орусияда ЭЕ/АҮ медиасынын популярдуулугу артууда: 2021-жылдан бери «Свобода» радиосунун сайты айына 16 миллион жолу көрүлүүдө.

WWW.