882 Бардыгы /

ЖАЛАЛ-АБАД. Мамлекеттик салык кызматынын өкүлдөрү тарабынан Жалал-Абад облусунун Базар-Коргон районунан 1,5 миллион сомдон ашык бааланган 17 миң 777 бөтөлкө алкоголдук продукцияларын табышты.

Маалыматка караганда, мамлекеттик салыкчылар рейддик салыктык териштирүүнүн жүрүшүндө алкоголдук продукция мыйзамсыз сакталып жана сатылып жаткан кампаны издеп жүрүп акыры табышты. Субъектини дыкаат текшергенде, сатылуучу продукцияга карата лицензиясы жана коштомо документтери (шайкештик сертификаты, эсеп-фактуралар, товардык-транспорттук коштомо кагаздар) болгон эмес! Ошондуктан, бул фактыга ишкердик субъекттерге карата Кыргыз Республикасынын мыйзамдарына ылайык өтө катаал чаралар көрүлөт.

Ошентип, Мамлекеттик салык кызматы жарандарды контрафакттык же жасалма тамекини, ошондой эле алкоголдук продукция акциздик маркасы жок, же жасалма акциздик маркалар менен тийиштүү лицензиясыз сатылган фактыларды көргөндө жергиликтүү салык органына, 116 номери же (0779) 61-31-89 (whatsapp) номери боюнча кайрылууга чакырат. Белгилей кетээрибиз, алкоголдук жана тамеки продукциясын мыйзамсыз өндүрүүнү жана жүгүртүүнү аныктоо иштери мындан ары дагы тынымсыз улантылат.

«КАДАСТР» ИШКАНАСЫНЫН СУЗАКТАГЫ БАШЧЫСЫ КАРМАЛДЫ

ЖАЛАЛ-АБАД. «Кадастр» мамлекеттик мекемесинин Сузактагы филиалынын башчысы кызмат абалынан кыянаттык менен пайдаланган фактынын негизинде кармалды.

УКМКнын басма сөз кызматынын маалыматына караганда, 2021-жылдын 26-апрелинде УКМК тарабынан жерлерди пайдалануу чөйрөсүндөгү коррупциялык схемаларды жок кылуу боюнча иш-чаралардын жүрүшүндө Өкмөткө караштуу Жер ресурстары боюнча мамлекеттик Агенттигинин алдындагы «Кадастр» мамлекеттик мекемесинин Сузак филиалынын жетекчилиги «С.З.Т.» тарабынан кызмат абалынан кыянаттык менен пайдалануу фактысыны аныкталып, акырында буга биротоло бөгөт коюлду. Анткени, 2019-жылдын май айында Жалал-Абад облусунун Сузак районунун тургундарына жасалма буйруктардын негизинде турак-жай куруу үчүн жер тилкелери трансформациясыз берилген. Буга карабастан «Кадастр» мамлекеттик ишканасынын Сузак филиалынын жооптуу кызматкерлери жеке материалдык кызыкчылыктарын гана ойлошуп, жерге жеке менчик укугуна күбөлүктөрдү жазып беришкен.

Материалдар сотко чейинки өндүрүштүн алкагында Кыргыз Республикасынын Кылмыш-Жаза Кодексинин 320-беренесинин 3-бөлүмү (Кызмат абалынан кыянаттык менен пайдалануу) кылмыш белгилери боюнча кылмыштардын жана жоруктардын бирдиктүү реестрине катталды. «Кадастр» мамлекеттик ишканасынын Сузак районундагы башчысы «С.З.Т.» Джалал-Абад шаардык ШИББ убактылуу кармоочу жайына киргизилди.

ОШ КАЛААСЫ “БАЛДАРГА ЖАНА ЖАШТАРГА ЫҢГАЙЛУУ ШААР” МАКАМЫНА ТАТЫДЫ

ОШ. Кыргызстандын Түштүк башкалаасына “Балдарга жана жаштарга ыңгайлуу шаар” наамы ыйгарылды. Айтмакчы, “Балдарга жана жаштарга ыңгайлуу шаар” сынагынын жеңүүчүлөрүн сыйлоо аземине президент Садыр Жапаров катышты. Ал сыйлыкты Ош шаарынын мэри Таалайбек Сарыбашовго өзү тапшырды.

Баса, аталган сынакты Кыргызстандагы БУУнун Балдар Фондунун (ЮНИСЕФ) колдоосу аркасында  Маданият, маалымат, жаштар саясаты министрлиги тарабынан уюштурду.

Кыскасы, Ош шаарынын жетекчилиги жана мэриянын жаштар иштери боюнча комитети жаштарга заманбап шарт түзүүнүн үстүндө алгылыктуу жумуштарды жасоосун мындан ары дагы туруктуу улантмакчы.

ЖАЛАЛ-АБАДДА МУГАЛИМДЕР ТААЖЫ ИЛДЕТИНЕ КАРШЫ ЭМДЕЛҮҮДӨ

ЖАЛАЛ-АБАД. Жалал-Абад шаарында мугалимдер таажы илдетине каршы чекесинен эмделүүдө.

Жалал-Абад шаардык мэриясынан билдиришкендей, алдыда милиция кызматкерлери жана мамлекеттик кызматкерлер дагы эмдөөдөн толук өтүшөт. Ошондой эле вакцина алууну каалаган жарандар өздөрү деле жер-жерлердеги үй-бүлөлүк дарыгерлер топторуна кайрылышса болот.

Белгилей кетээрибиз: Кыргызстанда акыры бир күндө 2 миң 130 адам таажы илдетине каршы эмделди. Ал эми өлкө боюнча жалпысынан 20 миң 458 адам эмделсе, балардын арасынан 606сы вакцинанын экинчи дозасын алышты.

Алишер ТОКСОНБАЕВ

WWW.