996 Бардыгы /

БАТКЕН. Баткенде Ходжаи Аъло – Ворух жолу курулаары жөнүндө маалымат тарагандан кийин соцтармактын колдонуучулары Камчыбек Ташиев анклавга коридор ачканы жаткандыгын айтып нааразы болушкан эле. “Баткендеги Ворух анклавына эч кандай коридор берилген жок!” Бул тууралуу Кыргызстан Улуттук коопсуздук мамлекеттик комитетинин төрагасы Камчыбек Ташиев билдиргендигин анын жардамчысы Өткүрбек Рахманов Facebook баракчасына жарыялады.

Белгилей кетчү жагдай: ушул жылдын 6-майында, Кыргызстан менен Тажикстандын Кыргыз-Тажик чек арасындагы делимитация жана демаркация боюнча Өкмөттүк делегациясы биргелешкен билдирүү жасады. Ага ылайык эки өлкө Тажикстандын жарандарынын жана жүк ташыган унааларынын тоскоолдуксуз өтүүсү үчүн Ходжаи Аъло – Ворух жолун биргелишип курат. Кийин Тажик тарап автоунаа жолун туруктуу колдонот жана оңдоп-түзөп турат. Аталган жол Капчыгай (Танги) айылын айланып гана өтөт.

Бул маалымат элге тарагандан кийин соцтармактын колдонуучулары “Камчыбек Ташиев Ворухка коридор ачат экен. Тажикстан куралдуу кол салып, акыры көздөгөнүнө жетти” деген пикирлерин үстөккө-босток жаза башташты.

Ушундан улам Камчыбек Ташиев өзү аталган маселе боюнча төмөнкүчө түшүндүрмөсүн жарыялады: – Кыргыз-Тажик чек арасы боюнча оор кырдаалда өткөн сүйлөшүүлөрдүн жыйынтыгында биргелешкен билдирүү кабыл алганыбыз чын. 5-майдан 9-майга чейин №43 чек ара чекитинен №61 чек ара чекитине чейин, №135 чек ара чекитинен №141 чек ара чекитине чейинки бөлүктөр боюнча чек ара тилкесин чийип, жазуу иштери жүргүзүлөт. Мына ушул тилкелер боюнча гана 1924 жана 1927-жылдардагы, ошондой эле 1989-жылдагы карталар пайдаланылат. Дагы бир жолу баса белгилейм, аталган жылдардагы карталар ушул гана чек ара чекиттерин тактоодо колдонулат. Ворух анклавынын буга эч кандай тиешеси жок!

Кыргызстан Улуттук коопсуздук мамлекеттик комитетинин төрагасы Камчыбек Ташиев ошондой эле Ворух анклавына эч кандай коридор берилбегендигин баса белгиледи.

Алишер ТОКСОНБАЕВ

WWW.