1,167 Бардыгы /

Түркмөнстандын президенти Гурбангулы Бердымухамедов уулу Сердар Бердымухамедовго ахалтекин жылкысын белек кылды.

Ахалтекин жылкы комплексинде өткөн салтанаттуу иш-чаранын жүрүшүндө өлкө лидери Ханкервен аттуу жылкынын ысымынын «терең мааниси бар» экенин айтып, ал жашоонун уланышын билдире турганын белгиледи.

“Көптөгөн кылымдар мурда биздин жерлерден өткөн кербендер сыяктуу элдин мыкты салт-санаасы убакыт менен муундарды бириктирип, урпактан урпакка бериле берсин”, — деди түркмөн лидери.

Өз кезегинде өлкөнүн расмий маалымат каражаттары бул окуяны «мураскеликтин белгиси» деп мүнөздөп, Сердарды «элдин уулу» деп аташты.

Президент уулуна үч жаштагы Ханкервен аттуу айгырды 6-июнда, Ахалтекин жылкы комплексине барган маалда берди. Аны түркмөн лидери жыл сайын апрелдин акыркы жекшембисинде белгиленип келген “Ахалтекин жылкысынын күнүндө” өлкөнүн жылкы өстүрүүчүлөрүнөн белекке алган.

Сердар Бердымухамедовдун коомдук-саясий активдүүлүгү 2016-жылы башталган. Андан бери президент уулуна салтанаттуу түрдө спорттук марафондо символикалык эстафетаны тапшырып, аны “Мурас” аттуу жылкыга мингизип, сейилдеткен.

39 жаштагы Сердар Бердымухамедов Түркмөнстандын вице-премьери, Көзөмөл палатасынын башчысы жана Тышкы иштер министрлигинин жогорку кызматтагы аткаминери болуп эсептелет. Мындан тышкары ал “Түркмөн алабайынын” жана “Ахалтекин жылкысын өстүрүүчүлөрдүн” эл аралык ассоциацияларын жетектейт. Бул эки уюм тең президент Гурбангулы Бердымухамедовдун демилгеси менен түзүлгөн.

Быйыл апрелде түркмөн лидери уулуна “Эмгек сиңирген ит багуучу” деген наам ыйгарган.

WWW.