819 Бардыгы /

Мурдагы ырчы Жахонгир Атажановдун үйүндө оппозициячыл “Эрк” партиясынын курултайын өткөрүүгө катышкандар 15-июнда жапырт суракка чакырылды.

Партиянын активисти Абдусалом Эргашевдин айтымында, Фергана облусунун тергөөчүсү аны ырчынын үйүндө болгон жаңжалга байланыштуу күбө катары чакырганын билдирген. Бирок көбүнчө партиянын ишмердүүлүгү жөнүндө сураган.

– Тергөөчү бир нече жолу менден Атажановду президенттике талапкер катары көрсөтүү кимдин идеясы экенин сурады. Андан соң ал менден: “Эркчилердин” кимиси менен таанышсыз?” деди. Мен ага: “Баары менен таанышмын, бирок аттарын сизге айтпайм” дедим. Сурак учурунда тергөөчү Атажановдун үйүндө уюштурулган кол салууга такыр тиешеси жок суроолорду сурады. Мен алардын ниетин түшүнгөн жокмун, – деди Абдусалом Эргашев.

26-майда белгисиз кишилердин тобу оппозициячыл “Эрк” партиясынын курултайы өтүп жаткан Жахонгир Атажановдун үйүнө кирип барып, жумуртка менен ургулашкан. Соцтармактарда тараган видеодо белгисиз кишилер курултайдын катышуучулары менен урушуп, жаңжал чыгарганын көрүүгө болот.

Жахонгир Атажанов Ташкент шаардык прокуратурасына кайрылып, чыр чыгарган топтун 20дай катышуучусуна бейбаштык фактысы боюнча кылмыш ишин козгоону сураган.

42 жаштагы өзбекстандык ырчы Жахонгир Атажанов былтыр музыкалык карьерасын токтотконун, январь айында саясатка бел байлап, президенттик шайлоого аттанарын билдирген. Көп өтпөй Атажановдун Ташкент шаарындагы кеңсесине белгисиз аялдар келип, бул жер сойкукана экенин жана маңзаттар сатыларын айтып полицияны чакырышкан.

Жахонгир Атажанов Өзбекстандагы кысымдарга чыдабай үй-бүлөсү менен быйыл март айында Түркиянын Стамбул шаарына учуп кеткен.

Өзбекстанда президенттик шайлоо ушул жылы 24-октябрда өтөт. Бирок расмий талапкерлердин аты деле болсо белгисиз.

Президент Шавкат Мирзиёев экинчи мөөнөткө ат салышары айтылган.

WWW.