1,365 Бардыгы /

Британ аскерлери “Дефендер” эсминецин Орусия аннексиялап алган Крымдын жээги аркылуу өткөрүүнү өтө кылдаттык менен пландаган жана орус флоту менен аскердик аба күчтөрүнүн агрессивдүү аркетин да четке каккан эмес.

Бул тууралуу BBC журналисттери Улуу Британиянын Коргоо министрлигинин жашыруун документтерине таянуу менен билдирди.

Документтер салынган папка Кара деңиздеги окуяга бир күн калганда Лондондон алыс эмес Кент графствосундагы автобус аялдамасынан табылып, журналисттерге берилген.

Журналисттер алган документте Defender кемесине байланыштуу электрондук кат жазышуулар болгон. Анда британ эсминецинин ыктымал маршруту такууланган.

Документке ылайык, эки жерден: биринчиси, Крымдын жанынан, экинчиси, андан алыс аймактан жүрүү сунушталган. Натыйжада биринчи вариант тандалып алынган. Себеби экинчисинде Улуу Британия Орусиянын Крымды басып алышына макул болгондой таасир жаратышы мүмкүн деп айтылган. Талкуунун катышуучулары эсминецтин аракетине Орусиянын аскердик деңиз флоту жана авиациясы катаал реакция жасашы ыктымал экенин күтүшкөн.

Улуу Британиянын Коргоо министрлиги документтердин жоголгонун мойнуна алып, буга байланыштуу иликтөө жүрүп жатканын билдирди. Министрлик BBC жарыялаган документтердин чын экенин тастыктап, аскердик мекеменин өз аракеттерин терең изилдешин кадыресе көрүнүш деп атады.

Орусия Коргоо министрлиги аннексияланган Крым жарым аралына жакын жерде 23-июнда ФСБнин кемеси британ деңиз аскерлерине таандык Defender деген эсминец тарапка ок ачканын, жанына бомбалар ташталганын кабарлаган. Британиянын Коргоо министрлиги ок атууну алдын ала эскертилген машыгууга байланыштырып, бомбалар ташталганы тууралуу маалыматты четке каккан. Defender эсминеци эл аралык укукка шайкеш Украинага таандык жерде тынч жүрүш жасаганы айтылган.

WWW.