1,611 Бардыгы /

ЖАЛАЛ-АБАД. Жаза аткаруу мамлекеттик кызматынын (ЖАМКнын) жетекчилиги жана жооптуу инспекторлор Жалал-Абад шаарындагы №53-тергөө абагындагы Адам укуктарынын бузулушун жана түрмөнүн тазалыгын текшерип жатышат.

Буга дейре Кыйноолордун алдын алуу боюнча Улуттук борбордун Жалал-Абаддагы Өкүлчүлүгү тергөө абагында кармалгандардын укуктары катарынан бузулуп, а түгүл айрым аялдар сексуалдык ыдык көргөндүгүн дагы ачыктаган. Ошондой эле тергөө абагынын ашканасында тазалык такай сакталбай, камактагыларга бөлүнгөн тамак-аштын нормасы талапка жооп бербей жаткандыгы аныкталган.

Ошентип, Кыйноолордун алдын алуу боюнча Улуттук борбордун Жалал-Абад облусундагы Өкүлчүлүгү укук бузуу фактыларына байланыштуу ЖАМКтын кызматкерлери жана ички иштер органдарынын ишин оңдоо талабы менен прокуратурага дагы кайрылган. Расмий маалыматка караганда, Кыргызстанда 11 түзөтүү мекемеси, алты тергөө абагы, жалгыз түрмө, 13 түзөтүү абагы, 50 аймактык жаза аткаруу инспекциясы бар.  Ушул тапта жаза мөөнөтүн 9 миңден ашуун адам өтөп жаткан чагы.

Алишер ТОКСОНБАЕВ, өз кабарчы