1,110 Бардыгы /

Казакстанда “териштирүүлөр аяктаганга чейин” Кичи Талдыкөл көлүн жасалма жол менен соолутуу иштери убактылуу токтотулат. Бул тууралуу Республикалык коомдук кеңештин жыйынында Нур-Султан шаарынын акиминин орун басары Нурлан Нуркенов билдирди.

Экоактивист Жамиля Садыкованын айтымында, жыйында алар “Талдыкөл саз” эмес, “көп түрдүү флора жана фаунасы бар, өзүн-өзү тазалап турган экосистемалуу” көл экенин далилдей алышкан.

Казакстандык экоактивисттер буга чейин Талдыкөл көлүн коргоп бир нече жолу акцияларды өткөрүшкөн. Алардын айрымдарында полиция катышуучуларды кармап кеткен учурлар да болгон.

14-сентябрда сүрөтчүлөрдөн жана активисттерден турган топ “Шалкыма” деп аталган перформанс өткөрүшкөн. Ак кийим кийген жана колдоруна ак тасма кармаган тогуз киши “өз уясын коргоп жаткан ак куунун” элесин көрсөтүп, Талдыкөлдүн алдына келишкен.

Нур-Султан шаарындагы Есил дарыясынын сол жээгинде жайгашкан Кичи Талдыкөлдүн аянты 20 гектарды түзөт. Бийлик бул көлдүн ордуна турак-жай комплексин курууну пландап, аны жасалма жол менен соолутуу иштерин баштаган. Активисттер анча чоң эмес көл бул жерде флора жана фаунаны сактоого оң таасирин тийгизүүдө деп эсептешет.

WWW.