1,143 Бардыгы /

ОШ. Ош шаардык ички иштер башкармалыгынын кызматкери кармалды. Бул жөнүндө УКМКнын басма сөз кызматынан тастыкташты.

УКМКнын басма сөз кызматынын маалыматына таянсак,  Ош шаардык ички иштер башкармалыгынын кызматкери Жазык Кодексинин 326-беренесинин 1-бөлүмү (опузалап пара алуу) боюнча Кылмыштардын жана жоруктардын бирдиктүү реестрине катталган сотко чейинки өндүрүш ишинин алкагында колго түшкөн. Ош ШИИБдин кызматкери алдамчылык факты боюнча кылмыш ишин токтотуу үчүн жарандан пара – ири суммадагы акча талап кылган.

-Ушул жылдын 4-октябрында УКМК Ош ШИИБдин ички иликтөө кызматы менен биргеликте жүргүзгөн ыкчам тергөө иш-чараларынын жыйынтыгында пара алып жаткан жеринен ШИИБдин №5 шаардык милиция бөлүмүнүн аймактык тескөөчүсү — милициянын лейтенанты А.Т. кармалды. Ал убактылуу кармоочу жайга киргизилди. Учурда аталган кылмышка тиешеси бар башка адамдарды дагы аныктоого багытталган ыкчам тергөө иш-чаралары улантылууда, – дейт УКМКнын басма сөз кызматынын өкүлү.

          Айтмакчы, бул Ош шаарындагы алгачкы эле факт эмес. Тилекке каршы, мындай жосунсуз жоруктар ай сайын катталып жаткан чагы. Бирок, бирөөнүн дагы жыйынтыгы коомчулукка эмдигиче ачыкталбай келет.

 Алишер ТОКСОНБАЕВ, өз кабарчы