930 Бардыгы /

ЖАЛАЛ-АБАД. 2021-жылдын 30-сентябрь күнү Жалал-Абад ОИИБдин криминалдык милиция кызматы (КМК) тарабынан Сузак районунун аймагында Кудаш аттуу жаран мыйзамсыз ок атуучу куралын сактап жүргөндүгү боюнча ыкчам маалыматтар алынган.

Жалал-Абад ОИИБдин басма сөз кызматы маалымдагандай, алынган маалыматтын негизинде ыкчам-иликтөө иштери жүргүзүлүп ок атуучу курал сактаган жаран Сузак районунун тургуну 1993-ж.т. Т.Х. экендиги аныкталган. Ал Сузак РИИБи тарабынан Кыргыз Республикасынын Жазык кодексинин 206-беренеси (Автотранспорт каражаттарын айдай качуу) жана 200-беренесинин (Уурдоо) негизинде кармалып, убактылуу кармоочу жайда отургандыгы белгилүү болгон.

Жалал-Абад ОИИБдин жана Сузак РИИБдин КМКнын кызматкерлери тарабынан жүргүзүлгөн ыкчам иш-чаралардын жыйынтыгында Т.Х. мыйзамсыз сакталган ок атуучу куралын өз ыктыяры менен тапшырууга түшүнүк катын берген.

Аталган факт Кыргыз Республикасынын Жазык кодексинин 253-беренесинин (Куралды, ок-дарыларды мыйзамсыз жүгүртүү) негизинде  КЖБРге катталып,  сотко чейинки өндүрүш иши башталган.

Сотко чейинки өндүрүш иши боюнча Т.Х. суракка алынган. Ал өзүнүн көрсөтмөсүндө 2021-жылдын май айында Жалал-Абад шаарындагы Курорттун ат чабуучу майданынан материалга оролгон ок атуучу курал таап алып, бекитип койгондугун айткан. Арадан бир-эки күн өтүп мурда жасаган кылмыштары үчүн Сузак РИИБи тарабынан кармалып, убактылуу жайга киргизилгендигин, учурда өз ыктыяры менен ок атуучу куралды тапшырарын билдирген.

Сузак РИИБдин убактылуу кармоочу жайында кармалып отурганТ.Х.нын көрсөтмөсү боюнча жеринде текшерүү тергөө амалдары жүргүзүлүп, жыйынтыгында Сузак районунун аймагында эски базардын ичинен 1 даана ПМ үлгүсүнө окшогон ок атуучу курал материалга оролгон абалда табылып алынган.

Алынган ок атуучу куралга карата соттук-баллистикалык экспертиза дайындалып, ок атуучу курал Жалал-Абад ОИИБдин ыкчам криминалистикалык бөлүмүнүн эксперттерине тапшырылган.

Учурда сотко чейинки өндүрүш иши боюнча тергөө амалдары уланууда.