1,560 Бардыгы /

Европа биримдиги Казакстандагы абалды тынчтык жол менен жөнгө салууга жардам берүүгө даяр. Бул тууралуу ЕБдин тышкы саясат боюнча жогорку комиссары Жозеп Боррель билдирди.

Ал Жамааттык коопсуздук келишим уюмуна (ЖККУ) мүчө өлкөлөрдү Казакстандын эгемендигин сыйлоого чакырды. “Сырттан аскердик колдоо Казакстандын эгемендиги менен бүтүндүгүн, ошондой эле адам укуктарын сактоо менен тартылышы керек. Биз казак бийлигин азыркыдай оор учурда жарандардын укуктары менен эркиндигин, тынч жыйындарга чогулуу жана маалымат алуу укуктарын сактоого чакырабыз” – деди Боррель.

Мындан тышкары ал өлкөдөгү зордук-зомбулук учурларын сынга алып, адамдардын өлүмүнө карата тынчсыздануусун билдирди.

Буга чейин АКШ да Казакстандагы зомбулук учурларын сынга алып, өлкө бийлиги менен нааразылык акциялардын катышуучуларын сабырдуулукка жана абалды тынчтык жол менен жөнгө салууга чакырган.

ЖККУнун аскерлери Казакстанга бул өлкөнүн президенти Касым-Жомарт Токаевдин чакыруусу менен киргизилген. Токаев Казакстан “террорчулардын” кол салуусуна кабылганын билдирип, нааразылык акцияларды тышкы агрессияга салыштырган.

Азырынча тынч митингдер кантип башаламандыктарга айланып, кимдер курал-жаракка ээ болуп, кимдер күч түзүм кызматкерлери менен атышканы боюнча так маалыматтар жок. Казак бийлиги Алматыга чет өлкөдөн даярдыктан өтүп келген “20 миң террорчу” кол салганын билдирген.

Эркин журналисттер менен жергиликтүү тургундардын маалыматына караганда, Алматыда дале болсо ок атуунун үндөрү угулууда, бирок жалпысынан кырдаал бийликтин көзөмөлүндө. Бүгүнкү күндө шаарда нааразылык акциялар жок.

WWW.