1,017 Бардыгы /

Мунай тармагынан туруктуу жумуш талап кылган Жаңы-Өзөн шаарынын тургундары 7-февралда калаа акимчилигинин алдында дагы чогулушту.

Шаар жашоочулары жумуш талап кылып, көчөгө чыгып жатканына алты күн болду. Активисттер жумуш сурагандардын тизмеси 2500 кишиге жеткенин, ал күн сайын толукталып жатканын айтышууда.

Нааразы топко Маңгыстау облустук кеңешинин катчысы Нури Тумышев менен депутат Елубай Абилов келди. Бирок чогулгандар аларга кулак төшөгөн жок. Түштөн кийин жумушсуздардын бир нече өкүлү Жаңы-Өзөндүн акими Максат Ибагаров менен жолугушту.

— Облус акиминин демилгеси менен калктын муктаждыктарын камсыздоо, жумушка орноштуруу үчүн бардык органдар менен иштешип жатабыз. Мунун ичинде жумуш орундарын көбөйтүү боюнча да иш жүрүүдө, — деди Максат Ибагаров.

Активисттер акимдин комиссия түзүү демилгесин колдошкон жок. Себеби бул дагы тааныш-билиш менен аяктайт деп эсептешет.

Алар кайрадан Казакстан президенти Касым-Жомарт Токаевге, Маңгыстау облусунун акими Нурлан Ногаевге, Жаңы-Өзөн акими Максат Ибагаровго кайрылып, жумушка орноштурууну талап кылышты.

Жаңы-Өзөндө жумушсуздук – курч маселелердин бири. Татыктуу иш менен камсыздоону талап кылган митингдер байма-бай өтүп турат. Шаарда 160 миң киши жашайт.

Казакстандагы нааразылык толкуну 2-январда Маңгыстау облусундагы жана Жаңы-Өзөн шаарындагы суюлтулган газдын баасын арзандатууну талап кылган митингде башталган. Кийин саясий өңүт алган акциялар Алматы шаарында ири башаламандык менен коштолгон. Тополоңдо жалпы 227 адам өлгөнү аныкталды.

WWW.