1,338 Бардыгы /

НАТО Орусиянын ыктымал агрессиясына каршы туруу аракетинин алкагында уюмга мүчө өлкөлөрдүн чек араларында аскерлерин туруктуу жайгаштыруу маселесин караштырууда.

Бул тууралуу британиялык The Telegraph гезитине НАТОнун башкы катчысы Йенс Столтенберг билдирди. Анын айтымында, түндүк атлантикалык биримдик ушул тапта “фундаменталдуу трансформация” баскычында турат жана бул жараян Орусия президенти Владимир Путиндин аракеттеринин узак мөөнөттүү кесепеттерин эске алуу менен өтүп жатат.

“Азыр көрүп жатканыбыз – жаңы реалдуулук, Европа коопсуздугу үчүн жаңы норма. Ошол себептен аскерий жетекчилерибизди НАТОнун узак мөөнөттүү адаптациясы үчүн өз сунуштарын айтууга чакырабыз”, – деди Столтенберг.

Жакында ыйгарым укуктары дагы бир жылга узартылганын маалымдаган Йенс Столтенберг The Telegraph басылмасына уюмдун ишин кайра караштыруу маселеси боюнча бардык чечим быйыл июнда Мадридде өтө турган НАТОнун саммитинде кабыл алынарын кошумчалады.

Буга чейин Столтенберг түндүк атлантикалык альянстын чыгыш флангын күчтөндүрүү зарылдыгын бир нече жолу айткан.

24-февралдан башталган Орусиянын Украинага аскердик баскынчылыгы –Европада Экинчи дүйнөлүк согуштан бери боло элек качкындар каатчылыгын жаратты. Батыш өлкөлөрүнүн жетекчилери коргонуу саясатын кайра карап чыгууну ойлонуштурушууда.

WWW.