1,383 Бардыгы /

          ОШ. Ош облусуна караштуу Кара-Суу районунда милиция кызматкеринин он үч жаштагы баласы атасынын тапанчасынан өзүн-өзү  атып таштаган. Бул туурасында Ош облустук ички иштер башкармалыгынан билдиришти.

          Маалыматка караганда, 20-январда саат 08:25те Ош облустук милициясынын нөөмөт бөлүмүнө Кара-Суу районунун Дыйкан-Кыштак айылынын 13 жаштагы жашоочусу белгисиз ок атуучу куралдан денесинен жаракат алып, ооруканага түшкөндүгү боюнча маалымат түшкөн. Ош облустук ички иштер башкармалыгынын ыкчам тергөө тобу окуя болгон жерге чыгып, кароо жүргүзүп, бир даана 9 мм ПМ үлгүсүндөгү ок атуучу курал, аталган куралга эки даана магазин, 15 даана октору жана бир даана атылган октун гильзасын алышты. Алгачкы текшерүүнүн жүрүшүндө тастыкталгандай, аталган жерде жашаган үйдүн ээси 50 жаштагы ички иштер органынын кызматкери А.А. 20-январда Ош облустук милициясынын ыкчам тергөө тобунда жооптуу кызматкер катары жумушка жөнөп жаткан кезде, өзүнө бекитилген табелдик ок атуучу тапанчасын, эки даана магазин жана 16 даана октору менен жуунуучу бөлмөсүнүн тышына үстөлгө калтырып, жуунганы ичкери кирип кеткен. Дал ушул учурда мектепке жөнөп жаткан 13 жаштагы уулу О.И. тапанчаны кызыгып ойноп жатып, өзүн-өзү байкоосуздан атып таштаган. Жараат алган бала дароо Ош шаардык ооруканасына жеткирилген.

          Ош шаардык клиникалык ооруканасынын травматология бөлүмүнүн дарыгери тарабынан кароо жүргүзүлгөн. Дарыгердин айтымында, ушул тапта баланын ички органдары жабыркабаган, көкүрөктүн сол тарабына ок тийген. Абалы салыштырмалуу канааттандырарлык. Аң-сезими тунук, өз алдынча эле беймарал кыймылдайт.

          Жаш баланын алган денесиндеги жараатынын оордук даражасын аныктоо максатында соттук-медициналык, окуя болгон жерден табылып алынган куралга, окторго жана бир даана гильзага дагы соттук-дактилоскопиялык жана соттук-баллистикалык экспертизалар дайындалды. Аталган факт боюнча алгачкы териштирүү иштери кызуу жүргүзүлүүдө.

          Алишер ТОКСОНБАЕВ, өз кабарчы