735 Бардыгы /

Amnesty International эл аралык уюму дүйнө жүзү боюнча коронавирустан кеминде 7 миң медицина кызматкери каза болгонун билдирди.

Уюмдун белгилешинче, вирус менен күрөшүп жаткандар бардык зарыл коргоо каражаттары менен камсыз болушу керек.

«Саламаттык сактоо тармагынын ар бир кызматкеринин коопсуздукка укугу бар. Мексика, Бразилия жана АКШ сыяктуу өлкөлөрдө медиктер дале болсо көп өлүп жатат. Вирустун Түштүк Африкада жана Индияда тездик менен жайылып жатышы — бардык өлкөлөр тиешелүү чараларды көрүшү керектигин көрсөтүүдө», — деди уюмдун өкүлү Стив Кокберн.

Пандемия маалында Мексикада 1 320 медицина кызматкери каза болду. Өлкөдө вирус жуктургандар 610 миң кишиден ашып, дээрлик 66 миң бейтап көз жумду. Мексика бийлигинин маалыматына караганда, учурда өлкөдө 97 632 медик коронавирус жуктуруп алган.

Amnesty International уюмунун маалыматына ылайык, АКШда 1077, Улуу Британияда 649, Бразилияда 634, Орусияда 631, Индияда 573, Түштүк Африкада 240 жана Иранда 164 медик коронавирустан каза болду.

www.