699 Бардыгы /

Орусиянын президенти Владимир Путин менен тышкы иштер министри Сергей Лавров ТИМ өкүлү Мария Захарованын серб делегациясынын Вашингтонго жасаган сапарына байланыштуу билдирүүсү үчүн Сербиянын президенти Александр Вучичтен кечирим сурашты.

Бул тууралуу Вучичке шилтеме кылып Сербиянын RTS улуттук телеканалыбилдирди.

«Буга чейин Путин менен Сергей Лавров менден эч качан кечирим сурашкан эмес. Бирок Захарованын билдирүүсү боюнча экөө тең кечирим сурады. Мен тарбиялуу киши катары ал жөнүндө сөз да кылган эмесмин. Биздин ортобуздагы мамиле жакшы жана мен үчүн ал окуя анчалык деле маанилүү эмес деп эсептейм», — деди Александр Вучич.

«Подъём» басылмасы Путиндин Вучичтен кечирим сураганын Кремлдин басма сөз катчысы Дмитрий Песков ырастаганын жазды.

Бейшемби күнү эки өлкөнүн президенттери Захарованын «Фейсбуктагы» билдирүүсүнөн улам жаралган дипломатиялык жаңжалдан кийин алгачкы жолу телефон аркылуу сүйлөшкөнү кабарланган. Өткөн жумада Орусия ТИМинин расмий өкүлү «Фейсбуктагы» баракчасына Вучичтин АКШ президентинин иш бөлмөсүндө, Дональд Трамптын маңдайында отургучта отурган сүрөтүн жайгаштырган. Ага «Негизги туюм» (Основной инстинкт») тасмасын аткарган Шэрон Стоундун суракта бутун учкаштырып отурган кадрын кошуп: «Эгер силерди Ак үйгө чакырып, отургучту сурактагыдай коюп коюшса, анда экинчи сүрөттөгүдөй болуп отургула», деп жазган.

Александр Вучич Захарованын бул билдирүүсүн адепсиз жана примитивдүү деп атаган. Сербиянын бир топ саясатчылары да билдирүүнү кескин сынга алышкан. Өз кезегинде Захарова кечирим сурап, анын билдирүүсү туура эмес чечмеленген болушу мүмкүндүгүн айткан. «Анда болгону «өзгөчөлөр» тараптан жасалган текебердик мамиле болгон», — деп жазган Орусия ТИМ өкүлү.

Кремлдин маалыматына караганда, бейшемби күнкү телефондук сүйлөшүүнүн жүрүшүндө Путин менен Вучич негизинен Косово маселесин жөнгө салуу жөнүндө сөз кылышкан. «Серб президенти сүйлөшүү жакшы жана мазмундуу болгонун белгиледи. Ошондой эле орус бийлигинин Захарованын билдирүүсү боюнча жасаган реакциясы Орусия Сербияны канчалык сыйлай турганын көрсөткөнүн кошумчалады», — деп жазды Кремлдин басма сөз кызматы.

www.